निकष बदलले, जिरायतीसाठी हेक्टरी ११ हजार मिळणार
मुंबई : प्रतिनिधी
राज्यातील दुष्काळग्रस्त आणि नैसगिक आपत्तींमुळे नुकसान झालेल्या शेतक-यांना केंद्र सरकारने दिलासा दिला आहे. केंद्र सरकारने राष्ट्रीय आपत्ती प्रतिसाद निधी अंतर्गत (एनडीआरएफ) दिल्या जाणा-या आर्थिक मदतीच्या निकषात सुधारणा केली आहे. आता नव्या निकषानुसार जिरायती क्षेत्रासाठी हेक्टरी ११ हजार रुपये, बागायतीसाठी २२ हजार रुपये आणि फळबागांसाठी हेक्टरी ३० हजार रुपये मदत मिळणार आहे. परंतु यासाठी राज्य सरकारने यासंबंधीच्या प्रस्तावाला मंजुरी द्यावी लागणार आहे.
नैसर्गिक आपत्तीत मृत्यू झालेल्या व्यक्तींच्या कुटुंबीयांना मिळणारी मदतही ४ लाखांवरून ८ लाख रुपये करण्यात आली आहे. अतिवृष्टी, पूर आणि दुष्काळ यासारख्या नैसर्गिक आपत्तींमुळे होणा-या नुकसानीसाठी ही मदत दिली जाते. फळबागा, पशुधन, कुक्कुटपालन आणि घरांच्या नुकसानीसाठीच्या मदतीतही वाढ करण्यात आली. त्यामुळे नुकसानग्रस्तांना पूर्वीच्या तुलनेत अधिक आर्थिक मदत मिळण्याचा मार्ग मोकळा झाला आहे. सुधारित मदत निकष २०२६-२७ ते २०३०-३१ या पाच वर्षांच्या कालावधीसाठी लागू राहणार आहे. आर्थिक वर्ष २०२६-२७ पासून या निकषाची अंमलजावणी करण्याची तरतूद आहे. १ एप्रिल २०२६ नंतर झालेल्या नुकसानीसाठीही सुधारित दर लागू होण्याची शक्यता आहे.
आधी निकषांना
मंजुरी आवश्यक
केंद्र सरकारने मदतीच्या निकषात बदल करून मदतीची मर्यादा वाढवून दिली असली तरी राज्य सरकारच्या मंत्रिमंडळ बैठकीत या निकषांना मंजुरी मिळणे आवश्यक आहे. यासंबंधीच्या प्रस्तावाला मंजुरी देऊनच त्यानुसार अंमलबजावणी करावी लागणार आहे. त्यामुळे १ एप्रिलनंतर अतिवृष्टीमुळे नुकसान झालेल्या शेतक-यांना वाढीव दराने मदत मिळणार का, याकडे लक्ष लागले आहे.
