शिरूर अनंतपाळ : प्रतिनिधी
निरोगी बालक हीच सशक्त समाजाची पायाभरणी असून विद्यार्थ्यांचे आरोग्य जपणे ही सर्वांची सामूहिक जबाबदारी आहे. अशा आरोग्यविषयक मोहिमांमुळे विद्यार्थ्यांमध्ये स्वच्छता आणि आरोग्याबाबत जागरूकता निर्माण होण्यास मदत होते, असे प्रतिपादन जिल्हा परिषद सदस्या तथा समाजकल्याण समितीच्या सदस्या सौ. तुळसाबाई लोंढे यांनी केले.
विद्यार्थ्यांचे आरोग्य सुदृढ राहून त्यांची शारीरिक व बौद्धिक वाढ योग्य प्रकारे व्हावी, यासाठी राष्ट्रीय जंतनाशक दिनानिमित्त येरोळ येथील जिल्हा परिषद प्रशालेत जनजागृती कार्यक्रमाचे आयोजन करण्यात आले. या कार्यक्रमाचे उद्घाटन जिल्हा परिषद सदस्या तथा समाजकल्याण समितीच्या सदस्या सौ. तुळसाबाई लोंढे यांच्या हस्ते करण्यात आले.
यावेळी विद्यार्थ्यांना जंतनाशक गोळ्यांचे महत्त्व, वैयक्तिक स्वच्छता, आरोग्यदायी सवयी आणि जंतसंसर्गापासून बचाव करण्याच्या उपाययोजनांबाबत मार्गदर्शन करण्यात आले. जंतनाशक गोळ्यांच्या नियमित सेवनामुळे मुलांमधील रक्तक्षय व कुपोषणाचा धोका कमी करण्यास मदत होते. त्यामुळे आरोग्य विभागाच्या या मोहिमेत विद्यार्थी आणि पालकांनी सक्रीय सहभाग घ्यावा, असे आवाहन करण्यात आले. या प्रसंगी वैद्यकीय अधिकारी डॉ. शुभम सागडे, मुख्याध्यापक धम्मपाल निचळे, आरोग्य सहाय्यिका फातिमा शेख, गटप्रवर्तक शिवगंगा येरोळकर, आशा स्वयंसेविका संध्या जाधव, महादेवी लोंढे, आरोग्य विभागाचे अधिकारी-कर्मचारी, शिक्षकवृंद व ग्रामस्थ उपस्थित होते
