रेणापूर/लातूर : प्रतिनिधी
राज्याच्या साखर उद्योगात नावलौकिक असलेला रेणापूर तालुक्यातील रेणा सहकारी साखर कारखान्याचा गळीत हंगाम (२०२६-२७) ११ ऑक्टोबर २०२६ रोजी कारखान्याचे संस्थापक तथा सहकारमहर्षी दिलीपराव देशमुख व इतर मान्यवरांच्या हस्ते झाला. त्यानंतर प्रत्यक्ष ऊस गाळपास सुरुवात करण्यात आली. दि. २ नोव्हेंबर २०२६ अखेर कारखान्याने एकूण ७१,०४५ मे. टन ऊसाचे गाळप केले असून त्यापोटी ऊस गाळप शेतक-यांना दिवाळीपूर्वी ३ हजार मेट्रिक टनप्रमाणे पहिला हप्ता १८ कोटी ९५ लाख ८८ हजार रुपये शेतक-यांच्या खात्यावर जमा करण्यात आले आहे. रेणा साखर सर्कलमध्ये ऊस उत्पादकांची दिवाळी गोड होणार आहे. दरम्यान दिवाळीपूर्वी रक्कम शेतक-यांना दिल्याने ऊस उत्पादक शेतक-यांमध्ये आनंदाचे वातावरण पसरले आहे.
कारखान्याच्या २१ व्या गळीत हंगामाच्या शुभारंभप्रसंगी सहकारमहर्षी दिलीपराव देशमुख यांनी हंगाम २०२६-२७ मध्ये कारखान्यास गाळपासाठी ऊस पुरवठा करणा-या ऊस उत्पादक शेतक-यांना पहिला हप्ता प्रति मे. टन ३,००० रुपये प्रमाणे देण्याचे जाहीर केले होते. त्यानुसार त्यांच्या सूचनेप्रमाणे दि. ३१ ऑक्टोबर २०२६ अखेर कारखान्यास गाळपास आलेल्या ऊसाचे ऊस बिल दि. ३ नोव्हेंबर २०२६ रोजी संबंधित ऊस उत्पादक पुरवठादारांच्या बँक खात्यावर जमा करण्यात आले आहे सद्यस्थितीत आपल्या भागात दुष्काळजन्य परिस्थिती निर्माण झाली असून, शेतक-यांकडून कारखान्याकडे ऊस नोंद मोठ्या प्रमाणात झाली आहे मात्र, पाण्याअभावी ऊस उत्पादनात घट होत असून काही ठिकाणी ऊस पिकाचे नुकसान होत आहे. ही बाब लक्षात घेऊन शेतक-यांचे नुकसान टाळण्यासाठी कारखान्याचे दैनंदिन गाळप वाढवून नोंद झालेल्या सर्व ऊसाचे वेळेत गाळप करण्याचा मानस संचालक मंडळाचा आहे. उसाचा हप्ता दिपावली पूर्व बँक खात्यावर पडल्याने शेतक-यांत आनंदाचे वातावरण पसरले आहे.
