परभणी : दक्षीण मध्य रेल्वेच्या नांदेड वाणिज्य विभागामार्फत दि. ३१ जुलै रोजी विशेष तिकीट तपासणी अभियान राबविण्यात आले. या आभियानात एकूण ३३९ विनातिकीट व अनियमित प्रवासाची प्रकरणे आढळून आली. या कारवाईत रेल्वेच्या फुकट्या प्रवाशांकडून २ लाख ३३ हजारांचा दंड वसूल करण्यात आला आहे. या तिकीट तपासणी मोहिमेमुळे फुकट्या रेल्वे प्रवाशांचे धाबे दणाणले असून त्यांनी या कारवाईचा धसका घेतला आहे. तिकीट काढून प्रवास करणा-या प्रवाशांना विनातिकीट प्रवास करणा-या प्रवाशांचा त्रास होऊ नये यादृष्टीकोनातून ही मोहीम राबविण्यात येत आहे.
या आभियानात सहाय्यक वाणिज्य व्यवस्थापक शैलेश कुमार सिंह यांच्या मार्गदर्शनात विभागातील २४ गाड्यांची तपासणी करण्यात आली. या अभियानात २८ तिकीट तपासणी कर्मचारी, रेल्वे सुरक्षा दल कर्मचारी सहभागी झाले. सर्व तिकीट तपासणी पथकांनी या मोहिमेत सक्रिय सहभाग नोंदविला. या कारवाईत विनातिकीट प्रवास २२६ प्रकरणातून २ लाख ६८५ रूपये, अनियमित प्रवासाच्या २९ प्रकरणातून १५ हजार ८१५ रूपये आणि बुक न केलेले सामानाच्या ९३ प्रकरणातून १६ हजार ८०० रूपये इतका दंड वसूल करण्यात आला.
हे अभियान नांदेड विभागाच्या वैध तिकीटधारक प्रवाशांना अधिक आरामदायी प्रवास उपलब्ध करून देणे, रेल्वे महसुलाचे संरक्षण करणे आणि प्रवाशांमध्ये तिकीटासह प्रवासाबाबत जनजागृती करण्याच्या दृष्टीने राबविण्यात आले. प्रवाशांनी वैध तिकीट किंवा योग्य प्रवास प्राधिकरणासहच प्रवास करावा. प्रवाशांच्या सोयीसाठी आणि रेल्वे महसुलाच्या संरक्षणासाठी अशा विशेष तिकीट तपासणी मोहिमा भविष्यातही नियमितपणे राबविण्यात येतील, असे दक्षिण मध्य रेल्वेच्या वतीने कळविण्यात आले आहे.
