अहिल्यानगर : प्रतिनिधी
उत्तर युरोपातील एस्टोनिया देशात आयोजित जागतिक रोबोटिक्स चॅम्पियनशीप स्पर्धेत अहिल्यानगरच्या दिया प्रीतम छाजेड व इशिका अभिजित अडसूळ या दोन भारतीय विद्यार्थिनींनी ऐतिहासिक यश संपादन करत भारताचा तिरंगा अभिमानाने फडकावला आहे. जगभरातील ७० देशांतील २ हजारांहून अधिक विद्यार्थ्यांना मागे टाकत दोघींनी प्रथम क्रमांक पटकावून जागतिक विजेतेपद मिळवले.
मूळची अहिल्यानगरची असलेली दिया सध्या बारामती येथील विद्या प्रतिष्ठानच्या विनोदकुमार गुजर बाल विकास मंदिर प्रशालेत इयत्ता नववीत शिक्षण घेत आहे. या स्पर्धेतील विशेष आकर्षण ठरला दियाने विकसित केलेला मोबाईलद्वारे ऑपरेट होणारा शेतीसाठी उपयुक्त रोबोट. हा रोबोट पेरणी, फवारणी व नांगरणी यांसारखी अनेक शेतीकामे एकाच यंत्राद्वारे करू शकतो. तसेच तापमान, हवामानातील बदल व वातावरणातील आर्द्रता मोजण्याची क्षमताही त्यामध्ये आहे.
एस्टोनिया येथे झालेल्या या जागतिक स्पर्धेत दहा विविध गटांतील सर्व वयोगटांतील स्पर्धक सहभागी झाले होते. अमेरिका, युरोप व आशिया खंडातील अत्याधुनिक तंत्रज्ञानाने संघ सहभागी झाले असतानाही नावीन्यपूर्ण संकल्पना, अचूक सादरीकरण व आत्मविश्वासाच्या जोरावर दिया व इशिका यांनी सर्व फे-या यशस्वीरीत्या पार करत अंतिम विजेतेपदावर आपले नाव कोरले. दिया छाजेड हिने सांगितले की, भारत हा कृषिप्रधान देश आहे. अन्न निर्माण करणा-या शेतक-यांचे कष्ट कमी करून कमी खर्चात अधिक उत्पादन कसे घेता येईल, याच उद्देशाने हा रोबोट तयार केला. या उल्लेखनीय यशाबद्दल दोघींना मिळून एक लाख रुपयांचे रोख पारितोषिक व प्रशस्तीपत्र प्रदान करण्यात आले असून, लवकरच सुवर्णपदक देण्यात येणार आहे.
