दिल्ली उच्च न्यायालयाचे आदेश, गीतांजली यांना दिलासा
नवी दिल्ली : वृत्तसंस्था
दिल्लीच्या जंतरमंतर मैदानावरील कॉकरोच जनता पार्टी आणि नीटच्या विद्यार्थ्यांनी सुरू केलेल्या आंदोलनाचा केंद्रबिंदू असणा-या सोनम वांगचूक यांच्याबाबत दिल्ली उच्च न्यायालयाने महत्त्वाचा निकाल देत त्यांना डॉक्टरांच्या देखरेखीखाली दिल्लीतील मेदांता या खासगी रुग्णालयात हलवण्याचे आदेश दिले.
दिल्ली पोलिसांनी शनिवारी सकाळी सोनम वांगचूक यांना बळजबरीने जंतरमंतरवरून उचलून सफदरगंज रुग्णालयात भरती केले होते. यानंतर त्यांची पत्नी गीतांजली यांनी दिल्ली उच्च न्यायालयात धाव घेत सोनम वांगचूक यांना खासगी रुग्णालयात हलवण्याची परवानगी द्यावी, अशी मागणी केली होती. त्यांच्या या याचिकेवर मंगळवारी दिल्ली उच्च न्यायालयात सुनावणी झाली. तेव्हा न्यायालयाने सोनम वांगचूक यांना डॉक्टरांच्या देखरेखीखाली दिल्लीतील मेदांता या खासगी रुग्णालयात उपचार केले जाणार आहेत.
सोनम वांगचूक यांच्या पत्नी गीतांजली यांनी आपल्या सरकारी यंत्रणांवर विश्वास नसल्याचे सांगत आपल्या पतीला सफदरगंज रुग्णालयातून हलवण्याची परवानगी मिळावी, अशी मागणी केली होती. सोनम वांगचूक यांना दिल्ली पोलिसांनी सफदरगंज रुग्णालयात जबरदस्तीने आणले होते. त्यांना ज्या मजल्यावर ठेवले होते, तिथे मोठा पोलिस बंदोबस्त तैनात होता.सोनम वांगचूक यांच्या भेटीगाठींवर निर्बंध लादण्यात आले होते. याविरोधात त्यांच्या पत्नीने दिल्ली उच्च न्यायालयात धाव घेतली होती. अखेर न्यायालयाने त्यांची विनंती मान्य करत सोनम वांगचूक यांना मेदांता रुग्णालयात हलवण्याचे आदेश दिले.
दिल्ली उच्च न्यायालयाने सामाजिक कार्यकर्ते सोनम वांगचूक यांना पुढील वैद्यकीय उपचारांसाठी मेदांता रुग्णालयात हलवण्यास परवानगी दिली आहे. तसेच त्यांच्यावर उपचारासाठी डॉक्टरांचे विशेष पॅनल स्थापन करण्याचे निर्देश रुग्णालयाला दिले आहेत. न्यायालयाने स्पष्ट केले की, वांगचूक यांचे सर्व वैद्यकीय अहवाल या डॉक्टरांच्या पॅनलसोबत सामायिक केले जावेत.
केंद्र सरकारने न्यायालयात सांगितले की, वांगचूक यांनी स्वत:च्या पसंतीचे रुग्णालय आणि डॉक्टर निवडण्यास सरकारची कोणतीही हरकत नाही. मात्र, त्यांच्या प्रकृतीची चिंता लक्षात घेता डॉक्टरांच्या सल्ल्याविरुद्ध त्यांना रुग्णालयातून डिस्चार्ज देऊ नये, अशी विनंती केंद्र सरकारने केली होती.
