शिरूर अनंतपाळ : तालुक्यात यंदाच्या खरीप हंगामात पावसाने पाठ फिरवल्याने पिकांची अवस्था अत्यंत बिकट झाली आहे. तालुक्यात प्रत्यक्ष पेरणी झालेल्या २५ हजार ७९६.४० हेक्टर क्षेत्रावरील पिकांना पावसाअभावी मोठा फटका बसला असून, अनेक ठिकाणी पिके करपून गेली आहेत. त्यामुळे गतवर्षी ओल्या दुष्काळाचा फटका बसलेल्या शेतक-यांवर यंदा कोरड्या दुष्काळाचे संकट ओढवले आहे. खरीप हंगाम हातचा जाण्याची परिस्थिती निर्माण झाल्याने शेतक-यांचे शासनाच्या मदतीकडे लक्ष लागले आहे.
तालुक्यात २८ हजार ३६७ हेक्टर लागवडीलायक क्षेत्र असून तालुक्याची सरासरी खरीप पेरणी २६ हजार ५७६ हेक्टर आहे. यंदा प्रत्यक्षात २५ हजार ७९६.४० हेक्टर क्षेत्रावर पेरणी झाली असून पेरणीची टक्केवारी ९७.०६ टक्के आहे.सुरुवातीला पावसाने साथ दिल्याने शेतक-यांनी मोठ्या अपेक्षेने पेरणी केली. मात्र, त्यानंतर पावसाने दीर्घकाळ दडी मारल्याने पिकांची वाढ खुंटली असून अनेक भागांत पिके सुकून गेली आहेत.
तालुक्यात यंदा सोयाबीनचा सर्वाधिक २२ हजार ६०२ हेक्टर क्षेत्रावर पेरा झाला आहे. त्यापाठोपाठ तूर ३ हजार ४८ हेक्टर, उडीद २८७ हेक्टर, इतर तृणधान्ये ६१.५० हेक्टर, ज्वारी २० हेक्टर, मूग ५.१३ हेक्टर आणि मका ५ हेक्टर क्षेत्रावर पेरणी झाली आहे. उर्वरित क्षेत्रावर इतर पिकांचा पेरा करण्यात आला आहे. सोयाबीन हे तालुक्यातील प्रमुख खरीप पीक असल्याने पावसाच्या खंडाचा सर्वाधिक परिणाम या पिकावर झाला आहे. अनेक शेतशिवारात सोयाबीनची झाडे पिवळी पडून वाळली असून, काही ठिकाणी शेंगा भरण्यापूर्वीच पिके करपली आहेत. त्यामुळे उत्पादनात मोठी घट होण्याची शक्यता असून, शेतक-यांसमोर आर्थिक संकट उभे राहिले आहे.
