नवी दिल्ली : पंजाब किंग्सने करो या मरोच्या सामन्यात लखनौ सुपर जायंट्सचा ७ गडी राखून पराभव केला. पंजाबचा कर्णधार श्रेयस अय्यरने या सामन्यात आपल्या आयपीएल कारकिर्दीतील पहिलेवहिले शतक झळकावून संघाला एक अविश्वसनीय विजय मिळवून दिला. या विजयामुळे पंजाब किंग्सचे प्लेऑफमधील आव्हान अजूनही कायम आहे. पंजाब किंग्सचे आता १४ लीग सामन्यांनंतर १५ गुण झाले असून त्यांचा नेट रन रेट +०.३०९ झाला आहे. पंजाबचा प्लेऑफमधील पुढचा प्रवास राजस्थान रॉयल्सविरुद्ध मुंबई इंडियन्स यांच्यात होणा-या सामन्याच्या निकालावर अवलंबून असेल.
१९७ धावांचा पाठलाग करताना पंजाब किंग्सची सुरुवात खराब झाली. डावाच्या पहिल्याच चेंडूवर मोहम्मद शमीने प्रियांश आर्याला (0) बाद केले. त्यानंतर कूपर कॉनोलीही १८ धावा करून शमीचाच बळी ठरला. २२ धावांवर २ गडी गमावल्यानंतर प्रभसिमरन सिंग आणि श्रेयस अय्यर यांनी डावाची सूत्रे हाती घेतली. त्याने अवघ्या ३९ चेंडूंमध्ये ७ चौकार आणि २ षटकारांच्या मदतीने ६९ धावांची शानदार खेळी केली. त्याला अर्जुन तेंडुलकरने पायचीत केले. त्यानंतर कर्णधाराला साजेशी खेळी करत श्रेयसने ५१ चेंडूंमध्ये ११ चौकार आणि ५ गगनचुंबी षटकार ठोकत नाबाद १०१ धावांची मॅचविनिंग खेळी केली. सूर्यांश शेडगेने शेवटी नाबाद ९ धावा करत श्रेयसला चांगली साथ दिली. त्यामुळे पंजाबचा शानदार विजय झाला.
