नवी दिल्ली : प्रतिनिधी
भारतीय सेना स्वदेशी ‘सुसाइड ड्रोन’ म्हणजेच लोइटरिंग म्युनिशनची मोठी खेप खरेदी करण्याच्या तयारीत आहे. हे आत्मघाती ड्रोन स्फोटकांनी सज्ज असतील आणि शत्रूच्या हद्दीत घुसून त्यांच्या ठिकाणांचा पूर्णपणे नाश करतील.
हे ड्रोन असे असतील की, जॅमिंग (रडार सिग्नल अडवणे) आणि स्पूफिंग (खोटे रडार सिग्नल पाठवणे) अशा परिस्थितीतही ते आपले लक्ष्य अचूकपणे साध्य करू शकतील. म्हणजेच शत्रूच्या सैन्याला याची चाहूलही लागणार नाही आणि ते पूर्णपणे उद्ध्वस्त केले जातील. या मोठ्या प्रकल्पासाठी लवकरच लष्कराकडून टेंडर जारी होण्याची शक्यता आहे.
सूत्रांच्या माहितीनुसार, ही ऑर्डर पूर्ण करण्यासाठी अनेक भारतीय कंपन्या पुढे येणार आहेत. यामुळे परदेशी कंपन्यांवरील अवलंबित्व कमी होईल आणि आत्मनिर्भर भारत मोहिमेला मोठी चालना मिळेल. या ऑर्डरमुळे एक मजबूत स्वदेशी औद्योगिक इकोसिस्टम तयार होईल, ज्यामुळे लष्कराला गरज भासल्यास भारतीय कंपन्या तात्काळ अशा प्रणाली विकसित करून पुरवू शकतील.
रु. २,००० कोटींचा करार
भारतीय कंपन्या देशातच डिझाइन व विकसित केलेल्या लोइटरिंग म्युनिशनचा पुरवठा करण्यासाठी सज्ज झाल्या आहेत. सुरुवातीला हा करार सुमारे २,००० कोटी रुपयांचा असेल आणि पुढील काही वर्षांत त्यामध्ये अनेक पटींनी वाढ होण्याची शक्यता आहे. कारण भारतीय सेना आपल्या विविध युनिट्सना ‘सुसाइड ड्रोन’ किंवा लोइटरिंग म्युनिशनने सुसज्ज करण्याच्या योजनेवर काम करत आहे, जेणेकरून कमी अंतरावर किंवा शत्रूच्या प्रदेशात खोलवर घुसून मोठ्या प्रमाणात नुकसान करता येईल.
