डेहराडून : वृत्तसंस्था
उत्तराखंडमध्ये पाऊस आणि बर्फवृष्टीच्या कमतरतेमुळे हिमालय काळा पडत चालला आहे. पिथौरागढ जिल्ह्यात असलेले पंचाचूली, हंसलिंग आणि जगप्रसिद्ध ॐ पर्वत हिवाळ्यात बर्फाच्या जाड थराने झाकलेले असायचे, पण आता ते नाममात्र बर्फासह उभे आहेत. ही परिस्थिती केवळ चिंताजनक नाही, तर हिमालयाच्या बदलत्या हवामानाचेही सूचक आहे.
जानेवारीचा अर्धा महिना उलटला आहे, पण अजूनही बर्फवृष्टी झालेली नाही. दिवसा उन्हाच्या तीव्रतेमुळे उरलेला बर्फही वितळत आहे, ज्यामुळे हिमालयाची पर्वतरांग काळी दिसत आहे. पिथौरागढ जिल्ह्यातील गुंजी येथे जिथे या वेळी किमान दोन फूट बर्फ असायला हवा होता, तिथे धूळ उडत आहे. स्थानिक लोक हवामानाच्या या उदासीनतेमुळे आश्चर्यचकित झाले आहेत, कारण त्यांनी यापूर्वी अशी परिस्थिती कधीही पाहिली नव्हती.
हवामान तज्ज्ञांचे म्हणणे आहे की, पाऊस आणि बर्फवृष्टी न होण्याचे कारण पश्चिमी विक्षोभ (वेस्टर्न डिस्टर्बन्स) निष्क्रिय होणे हे आहे. पश्चिमी विक्षोभ सक्रिय झाल्यानंतरच पाऊस आणि बर्फवृष्टीची शक्यता आहे. तथापि, काही दिवस हीच स्थिती राहण्याची शक्यता आहे. हिमालयातील बर्फवृष्टीची कमतरता केवळ पर्यावरणासाठी धोकादायक नाही, तर स्थानिक लोकांच्या जीवनमानावर आणि अर्थव्यवस्थेवरही नकारात्मक परिणाम करू शकते.
ओम् पर्वत उघडा पडला
ओम पर्वत हिंदूंच्या श्रद्धेचे प्रमुख केंद्र आहे. कैलाश मानसरोवर, आदि कैलासला येणारे भाविक ओम पर्वताला नक्की पाहतात. ओम पर्वताची उंची ५,९०० मीटर आहे. यावेळी या पर्वतावर चार फुटांपेक्षा जास्त बर्फ असायला हवा होता, पण या शिखरावर नाममात्र बर्फ आहे.
