ठाकरेंना धक्का, लोकसभा सचिवालयाने दिली मंजुरी
नवी दिल्ली : वृत्तसंस्था
ठाकरेंच्या शिवसेनेतून बंडखोरी करत शिंदेंच्या शिवसेनेला पाठिंबा दिलेल्या ६ फुटीर खासदारांबाबत लोकसभा सचिवालयाने मोठा निर्णय घेत त्यांच्या गटाच्या विलिनीकरणाला मंजुरी दिली. त्यामुळे उद्धव ठाकरेंचे ६ खासदार शिंदेंच्या शिवसेनेचे अधिकृत खासदार बनले आहेत.
ठाकरेंच्या शिवसेनेचे ओमराजे निंबाळकर, संजय दिना पाटील, संजय देशमुख, संजय जाधव, भाऊसाहेब वाकचौरे, नागेश पाटील आष्टीकर या ६ खासदारांनी वेगळा गट स्थापन केला. नंतर या गटाने शिंदेंच्या शिवसेनेत विलिनीकरण केले. आता या विलिनीकरणावर लोकसभेचे अध्यक्ष ओम बिर्ला यांनी शिक्कामोर्तब केले. त्यामुळे या सहाही खासदारांची खासदारकी वाचली असून ते आता शिंदेंच्या शिवसेनेचे खासदार म्हणून काम करणार आहेत.
यावर उपमुख्यमंत्री एकनाथ शिंदे यांनी ज्या लोकांनी या खासदारांना निवडून दिले, त्यांची कामे होणे महत्त्वाचे आहे. आमच्याकडे आलेल्या ६ खासदारांनी त्यांच्या मतदारसंघाच्या विकासासाठी हा निर्णय घेतला आहे. त्यामुळे त्यांना मोठा विकासनिधी दिला जाईल, असे म्हटले. दरम्यान, लोकसभा सचिवांच्या निर्णयामुळे ठाकरेंच्या शिवसेनेला मोठा धक्का बसला. गेल्या लोकसभेच्या निवडणुकीत ठाकरेंच्या शिवसेनेतून निवडून आलेल्या ६ खासदारांनी त्यांची साथ सोडत शिंदेंच्या शिवसेनेसोबत जाण्याचा निर्णय घेतला. या ६ खासदारांनी आधी आपला एक वेगळा गट स्थापन केला. त्यानंतर या गटाला लोकसभा अध्यक्षांनी मान्यता दिली. नंतर या गटाने शिंदेच्या शिवसेनेत अधिकृतपणे विलिनीकरणाचा निर्णय घेतला. यावर ठाकरेंच्या शिवसेनेकडून आक्षेप घेण्यात आला. मात्र, अखेर लोकसभा अध्यक्षांनी या ६ खासदारांच्या विलिनीकरणाला मान्यता दिली.
ठाकरेंचे कार्यालय
काढून घेतले जाणार
ठाकरेंच्या ९ खासदारांपैकी दोन तृतीयांश ६ खासदार फुटल्याने मोठा पेच निर्माण झाला आहे. त्यामुळे ठाकरेंच्या पक्षाचे लोकसभेतील कार्यालय काढून घेतले जाण्याची शक्यता आहे. कारण नियमानुसार एखाद्या पक्षाचे लोकसभा आणि राज्यसभेतील मिळून किमान ५ खासदार असणे गरजेचे आहे तरच त्यांना एक कार्यालय दिले जाऊ शकते. पण आता शिवसेना उद्धव बाळासाहेब ठाकरे पक्षाचे लोकसभेत केवळ ३ खासदार उरले आहेत.
