औसा (प्रतिनिधी): लातूर जिल्ह्यातील औसा तालुक्यातील औसा तांडा येथे एका भीषण अपघातात ११ वर्षीय अल्पवयीन मुलाचा मृत्यू झाला. या घटनेनंतर परिसरात तणावाचे वातावरण निर्माण झाले असून, संतप्त नातेवाईकांनी रुग्णालयात गोंधळ घातला. दरम्यान, झालेल्या हाणामारीत चाकू हल्ल्यात दोघे जण जखमी झाले आहेत.
मिळालेल्या माहितीनुसार, औसा तांडा येथील परमेश्वर उर्फ गोट्या राठोड (वय ११) हा मुलगा काल दुपारी साडेबारा वाजेच्या सुमारास जात असताना भरधाव ट्रॅक्टरखाली चिरडला गेला. या अपघातात त्याचा जागीच मृत्यू झाला. या घटनेची माहिती मिळताच परिसरात शोककळा पसरली आणि नातेवाईकांनी घटनास्थळी धाव घेतली.
अपघातानंतर मृतदेह औसा येथील शासकीय रुग्णालयात नेण्यात आला. यावेळी मुलाच्या मृत्यूमुळे संतप्त झालेल्या नातेवाईकांनी रुग्णालयात जोरदार धुडगूस घातला. परिस्थिती तेव्हा अधिक बिघडली जेव्हा सायंकाळी ५ वाजेच्या सुमारास गावातून अपघात बघायला आलेल्या तरुणांमध्ये आणि मृताच्या नातेवाईकांमध्ये किरकोळ कारणावरून वाद झाला. या वादाचे रूपांतर मोठ्या तुंबळ हाणामारीत झाले. या राड्यात चाकूचा वापर करण्यात आल्याने दोघे जण गंभीर जखमी झाले आहेत.
घटनेची माहिती मिळताच औसा पोलीस ठाण्याचे पोलीस उपनिरीक्षक ढमाळे यांनी आपल्या ताफ्यासह तातडीने रुग्णालय परिसरात धाव घेतली. पोलिसांनी हस्तक्षेप करत जमावाला पांगवले आणि परिस्थिती नियंत्रणात आणली. रात्री उशिरापर्यंत या प्रकरणी अधिकृत गुन्हा दाखल करण्याची प्रक्रिया सुरू होती
