अयोध्या : अयोध्येतील राम मंदिरातील देणगी घोटाळा प्रकरणात श्रीराम जन्मभूमी मंदिराचे माजी महासचिव चंपत राय आणि ट्रस्टचे सदस्य अनिल मिश्रा यांना विशेष तपास पथकाने क्लीन चिट दिली आहे. उत्तर प्रदेशच्या गृह विभागाने या प्रकरणाच्या चौकशीसाठी एसआयटीची स्थापना केली होती. एसआयटीने आपला तपास पूर्ण करून अहवाल सादर केला असून या अहवालात चंपत राय आणि अनिल मिश्रा यांची आरोपी म्हणून नोंद करण्यात आलेली नाही.
एसआयटीच्या तपास अहवालानुसार, राम मंदिरातील देणगी घोटाळ्याप्रकरणी केवळ ८ जणांना आरोपी मानण्यात आले आहे. यामध्ये अविनाश शुक्ला, अनुकल्प मिश्रा, लवकुश मिश्रा, मनीष कुमार यादव, करुणेश पांडे, रमाशंकर मिश्रा, सुभाष श्रीवास्तव आणि रमाशंकर यादव उर्फ टिन्नू यांचा समावेश आहे. या प्रकरणाची चौकशी सुरू झाल्यानंतर चंपत राय आणि अनिल मिश्रा यांनी आपल्या पदांचा राजीनामा दिला होता. राजीनामा दिल्यानंतर चंपत राय यांनी अयोध्येत ४ महिन्यांची चातुर्मास साधना करण्याचा निर्णय घेतला. ते २१ नोव्हेंबरपर्यंत अयोध्येत राहून राम मंत्राचा जप आणि रामचरितमानसाचे पठण करणार आहेत.
चंपत राय दररोज सुमारे ६ तास मौन साधना करत आहेत. ७ जूनपासून ते रामकोट येथील तीर्थ क्षेत्र भवनात एकांतवासात असल्याचे सांगण्यात आले आहे. दरम्यान, अयोध्येतील श्रीराम जन्मभूमी तीर्थ क्षेत्र ट्रस्टच्या मुख्य कार्यकारी अधिकारी पदासाठीची निवड प्रक्रिया अंतिम टप्प्यात पोहोचली आहे. या पदासाठी उमेदवारांच्या मुलाखतींची प्रक्रिया पूर्ण झाली असून, आता ३ नावांचे अंतिम पॅनेल तयार करण्यात आले आहे. मिळालेल्या माहितीनुसार, उत्तर प्रदेशातील २ प्रसिद्ध अधिकारी या पदाच्या शर्यतीत आघाडीवर आहेत. योगेश्वर राम मिश्रा आणि राजेश पांडे यांच्या नावांची सर्वाधिक चर्चा असल्याचे सांगितले जात आहे.
राम मंदिराच्या उएड पदासाठीची निवड प्रक्रिया अत्यंत विस्तृत आणि कठीण होती. सुरुवातीला देशभरातून या पदासाठी तब्बल ५,५८५ अर्ज प्राप्त झाले होते. त्यापैकी ३,८७७ उमेदवारांनी आपला सविस्तर बायोडाटा सादर केला. त्यानंतर पात्र उमेदवारांच्या मुलाखती घेण्यात आल्या. आता मुलाखतींची प्रक्रिया पूर्ण झाल्यानंतर ३ उमेदवारांचे अंतिम पॅनेल तयार करण्यात आले आहे. त्यामुळे श्रीराम जन्मभूमी तीर्थ क्षेत्र ट्रस्टच्या नव्या सीईओची नियुक्ती लवकरच होण्याची शक्यता आहे.
