नागपूर : प्रतिनिधी
समृद्धी महामार्गावरील मुंबई व नागपूर कॉरिडॉरवर दरोडेखोरांच्या टोळीने धुमाकूळ घालत एकाच वेळी तीन गाड्यांना टार्गेट केले. रस्त्यावर धारदार वस्तू व खिळे फेकून लुटारूंनी श्रीकांत मिश्रा, पांडुरंग माने आणि मोहम्मद फरान यांच्या वाहनांचे टायर पंक्चा केले. वाहने थांबताच १० अज्ञात भामट्यांनी दगडफेक करत मिश्रा व माने यांच्याकडील मौल्यवान ऐवज बळजबरीने लुटला. तर अरिहन लानी यांनी गाडी न थांबवता पळ काढून स्वत:चा बचाव केला.
नागपूर-मुंबई समृद्धी महामार्गावर प्रवास करणा-या तरुणाला अडवून त्याच्या गळ्यातील सोन्याची चेन हिसकावून नेल्याची घटना समोर येत आहेत. याप्रकरणी वैजापूर पोलीस ठाण्यात गुन्हा दाखल करण्यात आला आहे. एफआयआरनुसार, साहिल सतीश सोनवणे (वय २२) हे २६ ऑगस्ट रोजी नागपूरहून मुंबईच्या दिशेने समृद्धी महामार्गावरून प्रवास करत होते. दुपारी सुमारे ४.१० वाजता मुंबई कॉरिडॉरमधील एक्सिट क्रमांक १८ जवळील टोलनाक्याच्या परिसरात त्यांची गाडी थांबवण्यात आली.
यावेळी एका सेल्टोस गाडीने त्यांची गाडी अडवली, तक्रारीनुसार, चार जणांनी सोनवणे यांच्या गाडीच्या दिशेने येत त्यांच्याशी वाद घातला. त्यानंतर एका व्यक्तीने त्यांच्या गळ्यातील सोन्याची चेन हिसकावून घेतली. या झटापटीत सोन्याची चेन तुटून आरोपी ती घेऊन पसार झाल्याचे तक्रारीत नमूद आहे. हिसकावून नेलेल्या सोन्याच्या चेनची किंमत सुमारे १ लाख ५० हजार रुपये असल्याचे एफआयआरमध्ये नमूद आहे.
