नवी दिल्ली : वृत्तसंस्था
दिवाळीत फटाके फोडण्याच्या मुद्यावरून सर्वोच्च न्यायालयात आज सुनावणी झाली. या सुनावणीदरम्यान दिवाळीत फटाके फोडण्यास पूर्णत: बंदी घालता येणार नाही. परंतु दिवसभरात फटाके फोडण्याची परवानगी देता येणार नाही, असा निर्वाळा सर्वोच्च न्यायालयाने दिला.
सर्वोच्च न्यायालयाचे न्यायमूर्ती एम. एम. सुंदरेश आणि न्यायमूर्ती पी. बी. वराळे यांच्या खंडपीठाने दिवाळीत फटाक्यांच्या वापरावर पूर्ण बंदी घालण्याच्या बाजूने नसल्याचे म्हटले. कारण त्यामुळे दिवाळी साजरी करणा-या लोकांच्या भावना दुखावल्या जाऊ शकतात. किंबहुना न्यायालयाने दिवसभर फटाके फोडण्याची परवानगी दिली जाणार नाही, असेही स्पष्ट केले.
आम्ही पूर्ण बंदीच्या मताशी सहमत नाही आणि आम्ही २४ तास फटाके फोडण्याची परवानगीही देणार नाही. पूर्ण बंदीमुळे लोकांच्या भावना दुखावल्या जातील आणि दिवसभर फटाके फोडण्याची परवानगी दिल्यास वृद्ध, आजारी आणि लहान मुलांसह इतर नागरिकांवर मोठा परिणाम होईल. आपल्याला असा उपाय शोधण्याची गरज आहे ज्याद्वारे आपण फटाके फोडण्यासाठी विशिष्ट वेळ निश्चित करू शकू, असे न्यायालयाने म्हटले.
यापूर्वीच्या सुनावणीदरम्यान न्यायालयाने केंद्रीय प्रदूषण नियंत्रण मंडळाला फटाक्यांवरील निर्बंध शिथिल करण्याबाबत विचार करण्यास सांगितले होते. न्यायालय २०१५ मधील एका खटल्यावर सुनावणी करत होते. या खटल्यांतर्गत न्यायालय दिल्ली आणि उत्तर भारतातील इतर राज्यांमध्ये जिथे ऑक्टोबर ते जानेवारीदरम्यान वायू प्रदूषणाची समस्या असते, अशा ठिकाणी फटाक्यांवर निर्बंध घालण्याचे आदेश देत आले आहे.
दरम्यान, दिल्लीतील खराब हवेच्या गुणवत्तेच्या सततच्या समस्येमुळे, न्यायालयाने यापूर्वी दिल्लीत फटाक्यांच्या वापरावर बंदी घातली होती. किंबहुना सर्वोच्च न्यायालयाने दिल्ली आणि राष्ट्रीय राजधानी क्षेत्रात दिवाळी सणादरम्यान मर्यादित कालावधीसाठी ग्रीन फटाके (पर्यावरणपूरक फटाके) विक्री आणि फोडण्यास परवानगी दिली होती. या वर्षी जुलै आणि ऑगस्टमध्ये झालेल्या सुनावणीदरम्यान न्यायालयाने सीपीसीबीकडून यावर प्रतिक्रिया मागितली होती.
