बीजिंग : इराण आणि अमेरिका यांच्यातील संघर्ष सध्या शिगेला पोहोचला असून पश्चिम आशियामध्ये युद्धाची तीव्रता कायम आहे. सध्याच्या तणावाच्या पार्श्वभूमीवर अमेरिकेचे अध्यक्ष डोनाल्ड ट्रम्प यांनी एक मोठा दावा फेटाळून लावला आहे. रशिया आणि इराणला चीन सामरिक मदत करत असल्याचे वृत्त त्यांनी पूर्णपणे खोटे असल्याचे सांगितले आहे.
ट्रुथ सोशल या आपल्या सोशल मीडिया प्लॅटफॉर्मवर एका निवेदनात ट्रम्प यांनी टीकाकारांवर कडक शब्दात निशाणा साधला. सुरू असलेल्या संघर्षात बीजिंग आणि मॉस्को इराणला पाठिंबा देऊन आपले जागतिक हितसंबंध कधीही धोक्यात घालणार नाहीत, असे त्यांनी स्पष्ट केले. तसेच, जर अशी कोणतीही मदत दिली जात असती, तर अमेरिकेच्या गुप्तचर यंत्रणांनी ती खूप आधीच शोधून काढली असती, असा विश्वास त्यांनी व्यक्त केला.
डोनाल्ड ट्रम्प यांनी यासंदर्भात त्यांच्या एक्सवर पोस्ट शेअर केली आहे. त्यात ते म्हणाले की, कट्टर डाव्या गटांकडून सातत्याने हे निराधार दावे केले जात आहेत की, चीन आणि रशिया इराणला सर्व प्रकारच्या संकटांतून बाहेर काढण्यासाठी आणि लष्करी अथवा सामरिकदृष्ट्या बळकट करण्यासाठी प्रत्यक्ष किंवा अप्रत्यक्षपणे मदत करत आहेत. जर ते सहकार्य करत असतीलच, तर ते अत्यंत मर्यादित स्वरूपात असेल. रशिया किंवा चीन सध्या इराणला कोणत्याही प्रकारे मदत करत आहेत, यावर आपला अजिबात विश्वास नाही, असे ट्रम्प यांनी स्पष्ट केले. आंतरराष्ट्रीय स्तरावर या दोन्ही महासत्तांचे मोठे नुकसान होऊ शकते, त्यामुळे या संघर्षात थेट सहभागी होण्याचा धोका ते निश्चितपणे पत्करणार नाहीत, असेही ते म्हणाले आहेत.
अमेरिकेपासून काहीही लपू शकत नाही
इराणला अन्य देशांकडून मिळणारी कोणतीही गुप्त लष्करी किंवा तांत्रिक मदत अमेरिकेच्या देखरेख ठेवणा-या यंत्रणांपासून लपून राहू शकत नाही, असे ट्रम्प म्हणाले. जर असे काही घडले, तर अमेरिकेला त्याची तत्काळ आणि त्वरित माहिती मिळेल. इराणच्या अणुकार्यक्रमाबाबत आपली कठोर भूमिका पुन्हा एकदा अधोरेखित करताना ट्रम्प म्हणाले की, तीव्र दबाव आणि निर्बंध असूनही इराणला वॉशिंग्टनसोबत करार करण्याची खरोखरच इच्छा आहे. परंतु पुढे कसे जायचे हे त्यांना सुचत नाही. अमेरिका कोणत्याही परिस्थितीत तेहरानला अण्वस्त्रे मिळवू देणार नाही, असा इशारा ट्रम्प यांनी दिला आहे. तसेच इराणने आपल्या आण्विक महत्त्वाकांक्षा आणि आक्रमक कारवाया पूर्णपणे थांबवल्यासच कराराचा मार्ग खुला होईल असे संकेत त्यांनी दिले आहेत.
