बीड / अंबाजोगाई: नीट पेपरफुटी प्रकरणाचा तपास दिवसेंदिवस तीव्र होत असताना, सीबीआयच्या (CBI) विशेष पथकाने गुरुवारी (२१ मे) बीड जिल्ह्यातील अंबाजोगाई शहरात मोठी गुप्त कारवाई केली. अंबाजोगाईतील एकाच घरातील दोन संशयित विद्यार्थी (बहीण-भाऊ) आणि त्यांच्या शिक्षिका असलेल्या आईची सीबीआय अधिकाऱ्यांनी तब्बल ३ तास कसून चौकशी केली. या कारवाईमुळे संपूर्ण मराठवाड्यातील शैक्षणिक वर्तुळात प्रचंड खळबळ उडाली आहे.
मोबाईल आणि मेमरी कार्ड जप्त, गुप्त ठिकाणी चौकशी
मिळालेल्या माहितीनुसार, सीबीआयच्या पथकाने अंबाजोगाईत अत्यंत गुप्तता पाळून ही चौकशी केली. चौकशी करण्यात आलेले दोन्ही विद्यार्थी सख्खे बहीण-भाऊ असून ते लातूर येथे राहून ‘नीट’ परीक्षेची तयारी करत होते.यातील बहीण ही ‘रिपीटर’ (पुन्हा परीक्षा देणारी) विद्यार्थिनी आहे, तर तिचा भाऊ पहिल्यांदाच ही परीक्षा देत होता. सीबीआयने या कारवाईदरम्यान संशयित विद्यार्थी आणि त्यांच्या आईचे मोबाईल फोन, सिम कार्ड आणि मेमरी कार्ड जप्त केले आहेत. डिजिटल पुराव्यांच्या फॉरेन्सिक डेटावरून पेपर पुरवठा साखळीचा शोध घेतला जात आहे. “लातूर हे महाराष्ट्रातील नामांकित कोचिंग क्लासेसचे मुख्य केंद्र असल्याने, या विद्यार्थ्यांचे आणि त्यांच्या शिक्षिका आईचे धागेदोरे लातूरमधील मोठ्या परीक्षा रॅकेटशी जोडले गेल्याचा सीबीआयला संशय आहे.”
लातूरचे ‘आरसीसी’ (RCC) कोचिंग नेटवर्क रडारवर
या प्रकरणात लातूरमधील प्रसिद्ध ‘आरसीसी’ (RCC) कोचिंग क्लासेसचे नाव आणि त्याचे संचालक शिवराज मोटेगावकर यांचे कनेक्शन समोर आले आहे. मोटेगावकर यांना सीबीआयने आधीच अटक केली असून, त्यांच्या फोनमधून लीक झालेली प्रश्नपत्रिका जप्त करण्यात आली आहे. तपासादरम्यान बीडमधील एका शिक्षक संघटनेच्या लेटरहेडवर मोटेगावकर यांचा ‘ब्रँड अंबेसिडर’ म्हणून उल्लेख आढळल्याने संशय अधिक गडद झाला होता. अंबाजोगाईतील या शिक्षिका आणि विद्यार्थ्यांचे मोटेगावकर किंवा मुख्य मास्टरमाईंड पी. व्ही. कुलकर्णी यांच्या नेटवर्कशी काय संबंध होते, याचा तपास सीबीआय करत आहे.
तपासाचा फोकस: ‘गेस पेपर’ की थेट पेपरफुटी?
सीबीआयने केवळ विद्यार्थ्यांवरच नाही, तर कोचिंग क्लासेसच्या कर्मचाऱ्यांवरही लक्ष केंद्रित केले आहे. परीक्षा संपल्यानंतर काही विशिष्ट केंद्रांवर गेलेल्या कर्मचाऱ्यांची भूमिका तपासली जात आहे. विशेष म्हणजे, ज्या विद्यार्थ्यांनी सोशल मीडियावर “पेपर खूप सोपा गेला आणि आरसीसीच्या ‘गेस पेपर’मधील प्रश्न जसेच्या तसे आले” असे व्हिडिओ किंवा प्रतिक्रिया दिल्या होत्या, अशा विद्यार्थ्यांची यादी तयार करून सीबीआय त्यांचे संपर्क आणि आर्थिक व्यवहार तपासत आहे.
आगामी फेरपरीक्षेच्या पार्श्वभूमीवर कारवाईला वेग
नीट परीक्षा पद्धतीतील या मोठ्या गोंधळानंतर केंद्र सरकारने २१ जून रोजी नीटची फेरपरीक्षा (Re-Exam) घेण्याची घोषणा केली आहे. पुढील महिन्यातील परीक्षेपूर्वी या संपूर्ण घोटाळ्याची पाळेमुळे उपटून टाकण्यासाठी सीबीआयने पुणे, लातूर, नांदेड आणि बीड परिसरातील कोचिंग क्लासेस चालक, मध्यस्थ आणि संशयास्पद पालकांच्या बँक खात्यांची चौकशी सुरू केली आहे.
