मुंबई : डॉ. होमी भाभा राज्य विद्यापीठाचे कुलगुरु डॉ. राजनीश कामत यांची कोल्हापूर येथील प्रतिष्ठित शिवाजी विद्यापीठाच्या कुलगुरुपदी नियुक्ती करण्यात आली आहे. महाराष्ट्र राज्याचे राज्यपाल तथा कुलपती जिष्णु देव वर्मा यांनी गुरुवारी या संदर्भातील अधिकृत घोषणा केली. शिवाजी विद्यापीठाचे माजी कुलगुरु डॉ. दिगंबर शिर्के यांचा कार्यकाळ ७ ऑक्टोबर २०२५ रोजी संपल्यामुळे हे पद गेल्या काही महिन्यांपासून रिक्त होते. या दरम्यान, सावित्रीबाई फुले पुणे विद्यापीठाचे कुलगुरु डॉ. सुरेश गोसावी यांच्याकडे या पदाचा अतिरिक्त कार्यभार सोपविण्यात आला होता.
नवीन कुलगुरुंच्या निवडीसाठी राज्यपालांनी कोईम्बतूर येथील भारतीय विद्यापीठाच्या गणित विभागाचे निवृत्त प्राध्यापक आणि विभागप्रमुख डॉ. पी. कंदास्वामी यांच्या अध्यक्षतेखाली एक विशेष निवड समिती गठीत केली होती. या समितीने शिफारस केलेल्या पात्र उमेदवारांच्या मुलाखती घेतल्यानंतर, राज्यपाल जिष्णु देव वर्मा यांनी डॉ. राजनीश कामत यांच्या नावावर शिक्कामोर्तब केले. डॉ. राजनीश कामत यांची ही नियुक्ती पाच वर्षांच्या कार्यकाळासाठी किंवा ते वयाची ६५ वर्षे पूर्ण करतील, यापैकी जी तारीख अगोदर असेल त्या कालावधीसाठी लागू राहणार आहे.
डॉ. राजनीश कामत यांचा शैक्षणिक व प्रशासकीय प्रवास
शिक्षण: डॉ. कामत यांनी शिवाजी विद्यापीठातूनच इलेक्ट्रॉनिक्स विषयात एम.एस्सी. (M.Sc.) पदवी पूर्ण केली आहे. त्यानंतर त्यांनी गोवा विद्यापीठातून पीएच.डी. (Ph.D.) प्राप्त केली.
अनुभव: त्यांना अध्यापन, उच्च दर्जाचे संशोधन आणि शैक्षणिक प्रशासनाचा व्यापक व दीर्घ अनुभव आहे.
संशोधन आणि लेखन: संशोधन क्षेत्रात त्यांचे योगदान मोठे असून, त्यांची २११ संशोधन पत्रके आंतरराष्ट्रीय जर्नल्समध्ये प्रसिद्ध झाली आहेत. तसेच त्यांनी लिहिलेली १६ पुस्तके देखील प्रकाशित झाली आहेत.
शिवाजी विद्यापीठाचेच माजी विद्यार्थी आणि माजी प्राध्यापक राहिलेले डॉ. कामत आता याच विद्यापीठाचे १४ वे कुलगुरु म्हणून धुरा सांभाळणार असल्याने शैक्षणिक वर्तुळातून त्यांचे विशेष अभिनंदन होत आहे.
