झालावाड : राजस्थानच्या झालावाडमध्ये एक भीषण रस्ता अपघात झाल्याची घटना समोर आली असून, व्हॅन आणि ट्रक यांच्यात झालेल्या धडकेत ९ जणांचा मृत्यू झाला आहे. अपघातानंतर परिसरात घबराट पसरली होती. अपघाताची माहिती मिळताच पोलिस घटनास्थळी दाखल झाले. पोलिसांनी दिलेल्या माहितीनुसार, अपघातात जीव गमावलेले लोक मध्य प्रदेशातून येत होते.
मिळालेल्या माहितीनुसार, झालावाड येथे झालेल्या भीषण अपघातात ९ जणांचा मृत्यू झाला तर १ जण गंभीर जखमी झाला आहे. भरधाव वेगाने जाणारी मारुती व्हॅन आणि ट्रक-ट्रॉली यांच्यात जोरदार धडक झाली. पोलिसांनी दिलेल्या माहितीनुसार, या अपघातात ज्यांना जीव गमवावा लागला ते मध्य प्रदेशातून एका लग्न समारंभात सहभागी होऊन परतत होते. अपघातानंतर घटनास्थळी घबराट पसरली. आजूबाजूच्या लोकांनी हे पाहताच मदतीसाठी तत्काळ घटनास्थळी धाव घेतली आणि अपघाताची माहिती पोलिसांना दिली.
जखमींना रुग्णालयात नेत असतानाच त्यांचा मृत्यू झाला होता. पोलिसांनी मृतदेहाचा शोध सुरू केला आहे. सध्या मृतदेह अकलेरा रुग्णालयाच्या शवागारात ठेवण्यात आले आहे. अकलेरा पोलिस घटनास्थळी हजर आहेत. या घटनेची माहिती मृताच्या नातेवाईकांना देण्यात आली आहे. कुटुंबीय घटनास्थळी पोहोचल्यानंतर पुढील कारवाई करण्यात येईल.
