वॉशिंग्टन डीसी : इराणचे दिवंगत सर्वोच्च नेते अयातुल्लाह अली खामेनी यांच्या अन्त्ययात्रेत लाखो नागरिक रस्त्यावर उतरून आक्रोश करत आहेत. हे पाहून अमेरिकेचे अध्यक्ष डोनाल्ड ट्रम्प देखील चकित झाले आहेत. मला वाटले होते की लोक त्यांचा द्वेष करतात, पण कदाचित हे खोटे अश्रूही असू शकतात असे ट्रम्प यांनी म्हटले आहे.
दरम्यान डोनाल्ड ट्रम्प यांनी इराणला पुन्हा एकदा नवी धमकीही दिली आहे. अन्त्यसंस्कारादरम्यान इराणच्या उर्वरित नेत्यांनाही आपण एका झटक्यात ठार करू शकतो. पण असे केले तर वाटाघाटीसाठी कुणीही शिल्लक राहणार नाही, यामुळे आपण असे करणार नाही. एवढेच नाही तर, इराण करारासाठी याचना करत असल्याचेही त्यांनी म्हटले आहे. दुस-याबाजूला, सुरक्षेच्या कारणास्तव अली खामेनी यांचे पुत्र आणि प्रतिनिधी मुज्तबा खामेनी हे आपल्या वडिलांच्या अन्त्यसंस्काराच्या विधींमध्ये सहभागी होणार नाहीत. इस्रायलच्या धमक्या आणि पाळत ठेवण्याच्या शक्यतेमुळे मुज्तबा यांचे जाहीरपणे उपस्थित राहणे धोक्याचे असल्याचे त्यांच्या प्रतिनिधीनी स्पष्ट केले आहे.
४ जुलैचे अमेरिकेशी कनेक्शन
अमेरिकन आणि इस्रायलच्या हल्ल्यात अली खामेनी यांचा मृत्यू झाला आहे. यानंतर आता त्यांच्यावर अन्त्यसंस्कार होत आहेत. महत्वाचे म्हणजे, इराणने ४ जुलैला अंत्यसंस्काराची प्रक्रिया सुरू केली आहे. ४ जुलैला अमेरिकेचा २५० वा वर्धापनदिन होता. ७ जुलै रोजी कोम शहरात धार्मिक कार्यक्रम होतील तर ९ जुलै रोजी मशहद येथे दफनविधी केला जाणार आहे.
एका आठवड्याची मुदत
दोन्ही पक्षांनी या अंत्यसंस्काराच्या पार्श्वभूमीवर वाटाघाटींमधून एक आठवड्याचा विराम घेतला आहे. या काळात कुणीही एकमेकांवर हल्ला करणार नाही, असे ठरले आहे. दरम्यान, अमेरिकेने इराणला अन्त्यसंस्कारासाठी एक आठवड्याची मुदत दिली असल्याचे ट्रम्प यांनी म्हटले होते.
