नांदेड : प्रतिनिधी
रेल्वे प्लॅटफॉर्मपावून अवध्या काही अंतरावर उभ्या असलेल्या एका कोचला अचानक आग लागली. अवघ्या काही वेळात या आगीने रौद्ररूप धारण केले होते. सदर घटना नांदेड येथील हुजूर साहेब रेल्वे स्थानकावर दि. २१ मे सकाळच्या सुमारास घडली. या घटनेमुळे काहीवेळ धावपळ उडाली. मात्र सुदैवाने हा कोच रिकामा होता, यामुळे मोठी दुघटना टळला.
नांदेड येथील हुजूर साहेब रेल्वे स्थानकाच्या बाजूला अतिरिक्त वा दुरूस्तीसाठी स्टेबल लाईनवर असे कोच ठेवले जातात. दि. २१ मे रोजी सकाळच्या सुमारास प्लॅटफॉर्म लाईनपासून काही अंतरावर उभ्या असलेल्या रिकाम्या रेल्वे कोचला अचानक आग लागली. उष्णतेमुळे अवघ्या काही वेळात या आगीने रौद्ररूप धारण केले. तेव्हा काहीवेळ धावपळ उडाली.
घटनेची माहिती मिळताच रेल्वे प्रशासनाने तातडीने हालचाल करत अग्निशमन व संबंधित यंत्रणांच्या मदतीने आग आटोक्यात आणली. यामुळे घटनेत कोणतीही जीवितहानी किंवा प्रवाशांना दुखापत झालेली नाही. आग लागलेला कोच रिकामा असल्याने संभाव्य मोठी दुर्घटना टळली. दरम्यान, नेमकी आग कशामुळे लागली याचा शोध घेण्याचे काम रेल्वे प्रशासनाकडून सुरू असून पुढील तपास सुरू आहे. रेल्वे स्थानक परिसरातील साईड ट्रकवर रिकामे रेल्वे कोच लावले जातात. या ट्रकला स्टेबल लाईन असे म्हणतात. या ट्रॅकवर लावण्यात आलेल्या रिकाम्या कोचला आग लागली होती.
