नागपूर : राज्यात कायदा व सुव्यवस्थेचा बोजवारा उडालेला असताना सत्ताधा-यांकडून फोडाफोडीचे राजकारण सुरू आहे. शिवसेनेचे(उद्धव बाळासाहेब ठाकरे) सहा खासदार फोडल्यानंतर आता मिंधे गटाने काँग्रेसकडे मोर्चा वळवला आहे. काँग्रेसचे विधिमंडळ नेते विजय वडेट्टीवार यांना शिंदे गटात येण्याची ऑफर मंत्री उदय सामंत यांनी दिली. त्यामुळे वडेट्टीवार शिंदे गटात जाणार असल्याच्या बातम्या सर्वत्र झळकू लागल्या. यावर आता स्वत: वडेट्टीवार यांनी स्पष्टीकरण दिले असून हे वृत्त फेटाळून लावले आहे.
विजय वडेट्टीवार यांनी एक्सवर पोस्ट करत सत्तेसाठी आपण विचारांशी तडजोड करणार नसल्याचे म्हटले आहे. मी काँग्रेस पक्षाचा एक निष्ठावंत कार्यकर्ता आहे. पक्षाने दिलेली प्रत्येक जबाबदारी प्रामाणिकपणे पार पाडली आहे आणि जनतेच्या प्रश्नांसाठी सातत्याने संघर्ष केला आहे. महायुती सरकारच्या अपयशावर आवाज उठवला की, काही जण माझ्याविषयी खोट्या आणि दिशाभूल करणा-या अफवा पसरवण्याचे काम करतात, असे वडेट्टीवार म्हणाले. शिंदे गटात जाणार का? पक्ष प्रवेश करणार का? कोणाला भेटले का? अशा प्रकारच्या निराधार बातम्या पेरल्या जातात.
काही पत्रकारही कोणताही तथ्य नसताना असे प्रश्न विचारून मुद्दाम संभ्रम निर्माण करण्याचा प्रयत्न करतात. ही पत्रकारिता नसून खोडसाळपणा आहे. जनतेच्या प्रश्नांपासून लक्ष विचलित करण्याचा हा प्रयत्न आहे, असा टोलाही वडेट्टीवार यांनी पत्रकारांना लगावला.
मी काँग्रेस पक्षाचा निष्ठावंत कार्यकर्ता
माझी भूमिका स्पष्ट आहे, मी काँग्रेस पक्षाचा निष्ठावंत कार्यकर्ता आहे आणि काँग्रेसच्या विचारांशी माझी बांधिलकी कायम आहे. पदासाठी किंवा सत्तेसाठी विचारांशी तडजोड करण्याचा प्रश्नच उद्भवत नाही, असेही ते म्हणाले. आज राज्यात शेतकरी, बेरोजगारी, महागाई, कायदा-सुव्यवस्था, महिला सुरक्षा, पायाभूत सुविधा अशा अनेक गंभीर प्रश्नांनी जनता त्रस्त आहे. या विषयांवर सरकारने उत्तर द्यावे, अशी अपेक्षा असताना काही मंडळी मुद्दाम अफवा पसरवून आणि व्यक्तीगत बदनामी करून मूळ प्रश्न झाकण्याचा प्रयत्न करत आहेत, असा आरोपही विजय वडेट्टीवार यांनी केला.
