सेलू : हवामान खात्याने दिलेल्या इशा-याप्रमाणे सेलू शहर आणि परिसरात गेल्या २४ तासांत ९६.३० मि. मी. पावसाची नोंद झाली आहे. त्यामुळे हा पाऊस अतिवृष्टीमध्ये मोडल्या जातो. मात्र अद्यापपर्यंत पावसाने वार्षिक सरासरी गाठलेली नाही. या पावसामुळे सेलू तालुक्यातील निम्न दुधना प्रकल्पाच्या जलसाठ्यात केवळ १ टक्काच वाढ झाली आहे. सद्यस्थितीत निम्न दुधना प्रकल्पाच्या जलसाठ्यात २३.५१ उपयुक्त जलसाठा आहे. त्यामुळे तालुक्यावरील दुष्काळाचे सावट अद्यापही संपलेले नाही. परभणी जिल्ह्यात गुरुवारी रेड अलर्ट अर्थात अतिवृष्टीचा इशारा दिलेला होता.
त्यानुसार जिल्ह्यातील सेलू शहर आणि तालुक्यात मागील २४ तासांत दिवसभर संततधार पाऊस सुरू होता. सेलू शहरासह ग्रामीण भागात देखील हा पाऊस सुरू होता. त्यामुळे थोडाफार का असेना मात्र शेतक-यांना दिलासा मिळाला आहे. या पावसामुळे शेतकामांना वेग आला आहे. पावसाने दडी मारल्याने कोमेजू लागलेल्या पिकांना जिवदान मिळाले आहे. त्यामुळे शेतक-यांमध्ये आशा निर्माण झाली आहे.
निम्न दुधनातील पाणीसाठा लक्षात घेता या ठिकाणचे पिण्याचे पाणी आरक्षित केलेले आहे. मात्र सिंचनाकरिता देखील प्रकल्पातील पाण्याचा वापर होतो. जून आणि जुलै ही दोन महिने संपून गेलेली आहेत तरी अद्यापपर्यंत पुरेसा पाऊस झालेला नाही. मात्र भविष्यात शेतीकरिता आवश्यक असलेला पाऊस निश्चितच पडेल अशी अपेक्षा आहे. आजपर्यंत जो पाऊस झालेला आहे त्या पावसामुळे येत्या वर्षातील पिण्याचे व सिंचनाच्या पाण्याचा प्रश्न अद्यापपर्यंत मिटलेला नाही. त्यामुळे दुष्काळाचे सावट कमी झालेले नाही. येत्या महिन्यात हवा तेवढा पाऊस पडेल अशी अपेक्षा आहे. त्यानंतरच पाणीप्रश्न सुटू शकतो.
निम्न दुधनात २३.५१ टक्के जिवंत पाणीसाठा
सेलू शहराला पाणीपुरवठा करणा-या निम्न दुधना प्रकल्पात सध्या २३.५१ टक्के जिवंत पाणीसाठा शिल्लक आहे. सदरचा पाणीसाठा सेलू शहराला पिण्याकरिता केवळ चार ते पाच महिने पुरेल एवढाच आहे. त्यामुळे निम्न दुधना प्रकल्पाच्या जलसाठ्यात वाढ होण्याकरिता जालना व परतूर या भागातील पाणलोट क्षेत्रात पाऊस झाला तरच प्रकल्पाच्या जलसाठ्यात वाढ होते. त्याचा लाभ सेलू शहरासह परभणी व नांदेड जिल्ह्याकरीता देखील होतो.
