नवी दिल्ली : ऍमेझॉन, फ्लिपकार्टसह प्रमुख ई-कॉमर्स कंपन्यांच्या ऑनलाइन ऑर्डर्समध्ये फेरफार करून ग्राहकांची फसवणूक करणा-या टोळीचा नोएडा पोलिसांनी पर्दाफाश केला. या प्रकरणी पाच जणांना अटक करण्यात आली असून असून त्यांच्या ताब्यातून सुमारे ७५ लाख रुपयांचा चोरीचा माल जप्त करण्यात आला आहे. या प्रकरणातील आणखी दोन आरोपी फरार असून त्यांचा शोध सुरू आहे. याच पार्श्वभूमीवर नागरिकांना ई-कॉमर्स प्लॅटफॉर्मवरून ऑर्डर केलेली वस्तू तपासूनच घ्या असे आवाहन पोलिसांकडून करण्यात आले.
डीसीपी साद मियां खान यांनी दिलेल्या माहितीनुसार, वारिस खान, सुनील कुमार, विजय सिंह, धर्मेंद्र आणि सूरज सिंह यांना अटक करण्यात आली आहे. तर भूपेंद्र आणि असलम उर्फ राजू खान हे दोघे अद्याप फरार असून त्यांचा शोध घेण्यासाठी विशेष पथके तैनात करण्यात आली आहेत. पोलिसांनी दिलेल्या माहितीनुसार, गेल्या तीन ते चार महिन्यांपासून ही टोळी सक्रिय होती. ऍमेझॉन आणि फ्लिपकार्टसारख्या ई-कॉमर्स कंपन्यांची महागडी पार्सल डिलिव्हरीसाठी बाहेर पडल्यानंतर आरोपी ती उघडत असत. त्यानंतर पार्सलमधील मूळ महागडा माल काढून त्याऐवजी स्वस्त किंवा असंबंधित वस्तू ठेवून पुन्हा पॅक केले जात होते. या प्रकारामुळे ग्राहकांसह संबंधित ई-कॉमर्स कंपन्यांनाही मोठा आर्थिक फटका बसत होता. चोरी केलेला महागडा माल आरोपी नंतर बाजारात विकून लाखो रुपयांची कमाई करत होते.
आतापर्यंत ७५ लाखांचा मुद्देमाल जप्त
पोलिसांनी केलेल्या कारवाईत मोठ्या प्रमाणावर महागडा ऐवज हस्तगत केला. यामध्ये प्रोटीन सप्लिमेंट्स, ब्रँडेड शूज, कपडे, इलेक्ट्रॉनिक गॅजेट्स, मुलांसाठीची वायरलेस उपकरणे, कान आणि रक्तदाब तपासण्याची वैद्यकीय उपकरणे, स्मार्ट डिव्हाइसेस तसेच विविध ऑनलाइन कंपन्यांचे टॅग आणि पॅकिंग साहित्य यांचा समावेश आहे. जप्त केलेल्या सर्व साहित्याची किंमत सुमारे ७५ लाख रुपये असल्याचे पोलिसांनी सांगितले.
फरार आरोपींचा शोध सुरू
चौकशीदरम्यान आरोपींनी या संपूर्ण रॅकेटचा मास्टरमाईंड वारिस खान असल्याची कबुली दिली. टोळीतील प्रत्येक सदस्याची स्वतंत्र जबाबदारी होती. काही जण पार्सलमधील माल बदलण्याचे काम करत, तर इतर सदस्य चोरीचा माल बाजारात विकण्याची व्यवस्था पाहत होते. या प्रकरणी सेक्टर-२० पोलिस ठाण्यात गुन्हा दाखल करण्यात आला असून फरार आरोपींना अटक करण्यासाठी पोलिसांकडून विविध ठिकाणी शोधमोहीम सुरू आहे.
