नांदेड : प्रतिनिधी
डिजिटल अरेस्टची भीती दाखवून सायबर गुन्हेगारांनी शहरातील एका ज्येष्ठ नागरिकाला तब्बल १४ लाख १५ हजार रुपयांचा ऑनलाइन गंडा घातला. याप्रकरणी नांदेड सायबर पोलिस ठाण्यात गुन्हा दाखल करण्यात आला असून आरोपींचा शोध सुरू करण्यात आला आहे.
पोलिसांनी दिलेल्या माहितीनुसार, ३० जून ते ४ जुलै २०२६ या कालावधीत पवननगर, तरोडा (खुर्द) येथील ज्येष्ठ नागरिक शिवाजी संभाजी तुंबलवाड वय ६७यांना काही अज्ञात व्यक्तींनी संपर्क साधला. आरोपींनी स्वत:ला पोलिस अधिकारी असल्याचे सांगून त्यांच्या नावाचा दहशतवादी कारवायांशी संबंध असल्याचा बनाव रचला. तसेच डिजिटल अरेस्ट करण्याची भीती दाखवत त्यांच्यावर मानसिक दबाव टाकला. या भीतीपोटी फिर्यादी तुंबलवाड यांच्याकडून आरोपींनी विविध ऑनलाइन व्यवहारांद्वारे एकूण १४ लाख १५ हजार रुपये आपल्या खात्यात वळते करून घेतले. फसवणुकीची बाब लक्षात आल्यानंतर त्यांनी सायबर पोलिस ठाण्यात तक्रार दाखल केली.
या प्रकरणी प्रिया मंडम, अमितकुमार चौधरी, संदीप यादव, प्रदीप जयस्वाल तसेच मोबाईल क्रमांकधारकांसह इतरांविरुद्ध भारतीय न्याय संहितेची विविध कलम तसेच माहिती तंत्रज्ञान अधिनियम २००० मधील संबंधित कलमांनुसार गुन्हा दाखल करण्यात आला आहे.
