मुंबई: प्रसिद्ध स्टँडअप कॉमेडियन प्रणित मोरे आणि त्याचे सहकारी सध्या कायदेशीर कचाट्यात सापडले आहेत. सोशल मीडियावर महिलांबाबत अवमानकारक, आक्षेपार्ह आणि अश्लील मजकूर प्रसारित केल्याचा ठपका ठेवत ‘महाराष्ट्र सायबर’ने प्रणित मोरेसह इतरांविरोधात गुन्हा दाखल केला आहे. या कारवाईमुळे मनोरंजन विश्वात खळबळ उडाली आहे.
प्रणित मोरेच्या ‘लाइव्ह स्टँड-अप शो’चे काही व्हिडिओ सोशल मीडियावर व्हायरल झाले होते. यामध्ये ३७० रुपयांच्या बिर्याणीचा वाद: एका शोदरम्यान प्रेक्षकांशी संवाद साधत असताना, एका तरुणाने डेटवर गेलेल्या तरुणीवर खर्च केलेल्या ‘चिकन बिर्याणी’च्या बिलाचा उल्लेख केला. ३७० रुपये खर्च केल्यावर ते पैसे ‘वसूल’ करण्याच्या त्याच्या विधानावर शोमधील लोक आणि स्वतः प्रणित मोरेही हसताना दिसले. हा व्हिडिओ व्हायरल होताच नेटकऱ्यांनी संताप व्यक्त केला. हे विधान महिलांचा अपमान करणारे आणि चुकीच्या मानसिकतेचे दर्शन घडवणारे असल्याचे म्हणत सोशल मीडियावर यावर कडक टीका झाली.
शिवाय प्रणित मोरेच्याच एका शोमध्ये डॉ. सेजल पवार यांनी वैद्यकीय महाविद्यालयीन अनुभवांबद्दल बोलताना ‘कॅडेव्हर’ (शरीरदान केलेल्या मृतदेह) संदर्भात एक वादग्रस्त विधान केले होते. हे वक्तव्य वैद्यकीय व्यवसायाची प्रतिष्ठा आणि नैतिकतेच्या विरोधात असल्याचा आरोप होत आहे.
मिळालेल्या माहितीनुसार, महाराष्ट्र सायबरने या प्रकरणाची गंभीर दखल घेतली असून BNS (भारतीय न्याय संहिता) आणि IT ॲक्टच्या विविध कलमांखाली गुन्हा दाखल करण्यात आला आहे. या प्रकरणी चौकशीसाठी प्रणित मोरे, हिमांशू जांगरा आणि डॉ. सेजल पवार यांना समन्स बजावण्यात आले आहेत. सध्या या प्रकरणाचा तपास सुरू असून, दोषी आढळणाऱ्यांवर कठोर कायदेशीर कारवाई करण्यात येणार असल्याचे प्रशासनाकडून स्पष्ट करण्यात आले आहे.
