नांदेड : प्रतिनिधी
नांदेड परिक्षेत्रात अवैध व्यवसायांवर कठोर कारवाई करत पोलिसांनी जुलै महिन्यात मोठी धडक मोहीम राबवली. पोलिस उपमहानिरीक्षक (डीआयजी) शाहाजी उमाप यांच्या मार्गदर्शनाखाली १ ते ३१ जुलै २०२६ या कालावधीत नांदेड, परभणी, हिंगोली व लातूर जिल्ह्यांत राबविण्यात आलेल्या विशेष मोहिमेदरम्यान एकूण १,८५४ गुन्हे दाखल करण्यात आले असून २० कोटी ४२ लाख ६४ हजार ६९० रुपयांचा मुद्देमाल जप्त करण्यात आला आहे.
या मोहिमेदरम्यान गुटखा, मटका-जुगार, अवैध दारू, अंमली पदार्थ, घातक शस्त्रे तसेच इतर बेकायदेशीर धंद्यांवर मोठ्या प्रमाणात कारवाई करण्यात आली. या कारवाईत भारतीय न्याय संहितेच्या विविध कलमांखाली ४८ गुन्हे, महाराष्ट्र जुगार कायद्यांतर्गत २९०, महाराष्ट्र दारूबंदी कायद्यांतर्गत १,२९२, शस्त्र अधिनियमांतर्गत ४४ आणि इतर कायद्यांनुसार १८० गुन्हे नोंदविण्यात आले. एकूण २,४१८ आरोपींविरुद्ध कारवाई करण्यात आली.
कारवाईचा आढावा घेतल्यास गुटख्यावरील कारवाईत ४८ गुन्हे नोंदवून सुमारे १.३९ कोटी रुपयांचा मुद्देमाल जप्त करण्यात आला.
