पूर्णा : पूर्णा पोलीस ठाण्याच्या हद्दीतील आव्हई शिवारातील गट क्रमांक १९९ व २०० मध्ये गांजाची लागवड केल्याचा प्रकार पोलिसांच्या कारवाईत उघडकीस आला आहे. शेताची पाहणी केली असता हिरवीगार गांजाची झाडे आढळून आली. या प्रकरणी दोघांवर गुन्हा दाखल करण्यात आला आहे.
राजपत्रित अधिकारी व दोन पंचांच्या उपस्थितीत ही झाडे उपटून त्यांचे वजन करण्यात आले. या कारवाईत काशिनाथ पांडुरंग पवार याच्याकडून ७ किलो ७६० ग्रॅम गांजा अंदाजे किंमत ३ लाख ८८ हजार रुपये, व्यंकटी बाजीराव पवार (दोघे रा. आव्हई) याच्याकडून २ किलो ३०० ग्रॅम गांजा अंदाजे किंमत १ लाख १० हजार रुपये असा मुद्देमाल जप्त करण्यात आला. दोन्ही आरोपींकडून मिळून १० किलो ६० ग्रॅम गांजा असा एकूण अंदाजे ५ लाख ३ हजार रुपये किमतीचा मुद्देमाल जप्त करण्यात आला आहे.
या प्रकरणी पो.ह. देविदास बुकरे यांच्या फिर्यादीवरू पूर्णा पोलीस ठाण्यात गुन्हा दाखल करण्यात आला आहे. ही कारवाई पोलिस निरीक्षक गजेंद्र सरोदे यांच्या मार्गदर्शनाखाली पोलिस उपनिरीक्षक चंदनसिंह परिहार, पोलिस अंमलदार रामकिशन काळे, गोविंद वड, देविदास बुकरे, रंगनाथ दुधाटे, हनुमान ढगे, संदीप चवरे व विलास बहुरे यांच्या पथकाने केली.
