निलंगा : प्रतिनिधी
सहशिक्षक अनिल जाधव यांचे शैक्षणिक व सामाजिक कार्य प्रेरणादायी असल्याचे गौरवोद्गार शिक्षणाधिकारी तृप्ती अंधारे यांनी काढले. जिल्हा परिषद प्राथमिक शाळा, चिंचोली भंगार येथील सहशिक्षक अनिल जाधव यांच्या सेवापूर्तीनिमित्त आयोजित सत्कार समारंभ ३१ मे रोजी निलंगा येथील वृंदावन मंगल कार्यालयात उत्साहपूर्ण वातावरणात पार पडला. या कार्यक्रमात त्या बोलत होत्या.
कार्यक्रमाच्या प्रारंभी राजमाता जिजाऊ, छत्रपती शिवाजी महाराज व पुण्यश्लोक अहिल्यादेवी होळकर यांच्या प्रतिमांचे पूजन व दीपप्रज्वलन करण्यात आले. जिजाऊ वंदनेने कार्यक्रमाची सुरुवात झाली. कार्यक्रमाच्या अध्यक्षस्थानी उपविभागीय अधिकारी शरद झाडके हे उपस्थित होते तर प्रमुख पाहुणे म्हणून एस. जी. पाटील (गटविकास अधिकारी), चंद्रहास म्हेत्रे (गटशिक्षणाधिकारी), उद्योजक उदय पाटील, डॉ. विवेक सोताडेकर, संभाजी नवघरे, धनंजय उजनकर, दिलीपराव धुमाळ, अरुण सोळंके, आनंद जाधव व एस. बी. मुळे हे उपस्थित होते. तृप्ती अंधारे म्हणाल्या की, अनेक संघर्षांवर मात करून अनिल जाधव यांनी शिक्षण क्षेत्रात उल्लेखनीय कार्य केले आहे. आई-वडिलांच्या संस्कारांची जाणीव ठेवत त्यांनी विद्यार्थ्यांमध्ये चांगले संस्कार रुजविण्याचे कार्य केले आहे. शिक्षक व्यवसाय हा सर्व नोक-यांपेक्षा आनंददायी असून विद्यार्थ्यांना घडविण्याची मोठी जबाबदारी शिक्षकांवर असते, असेही त्यांनी नमूद केले. यावेळी प्रतापराव जाधव व शांताबाई जाधव या त्यांच्या आई-वडिलांचा सत्कार करण्यात आला. त्यानंतर अनिल जाधव व वैशाली जाधव यांचा सपत्नीक मानपत्र व भेटवस्तू देऊन शाळा, केंद्र व मित्रपरिवाराच्या वतीने गौरव करण्यात आला.
एस. जी. पाटील, संभाजी नवघरे, श्रुती जाधव, ज्ञानदेव बरमदे, धनंजय उजनकर, उदय पाटील व चंद्रहास म्हेत्रे यांनी मनोगत व्यक्त करून शुभेच्छा दिल्या. अनिल जाधव यांनी आपल्या सेवाकाळातील आठवणींना उजाळा देत भावनिक मनोगत व्यक्त केले. अध्यक्षीय समारोपात शरद झाडके यांनी संघर्षातून यश मिळविणा-या आणि आई-वडिलांच्या भावनांची कदर करणा-या व्यक्तींची समाजाला गरज असल्याचे प्रतिपादन केले. कार्यक्रमाचे प्रास्ताविक मराठा सेवा संघाचे जिल्हा सचिव एम. एम. जाधव यांनी केले.
