लातूर : प्रतिनिधी
तावरजा मध्यम प्रकल्पावरून लातूर तालुक्यातील सुमारे वीस गावांना पाणीपुरवठा करणारी वीस खेडी पाणीपुरवठा योजना गेल्या काही वर्षांपासून पाईपलाईन दुरुस्ती तसेच विविध तांत्रिक कारणांमुळे बंद आहे. त्यामुळे संबंधित गावांतील नागरिकांना पाणीटंचाईचा सामना करावा लागत असून, तावरजा मध्यम प्रकल्पातून होणारा पाणीपुरवठा तातडीने सुरळीत करण्याची मागणी करण्यात आली आहे.
माजी आमदार धिरज देशमुख यांच्या सूचनेनुसार लातूर पंचायत समितीचे सभापती, उपसभापती, पंचायत समिती सदस्य तसेच काँग्रेस पक्षाचे पदाधिकारी व कार्यकर्त्यांच्या शिष्टमंडळाने जिल्हाधिकारी भारत बास्टेवाड यांची भेट घेऊन याबाबत निवेदन सादर केले. तावरजा मध्यम प्रकल्पातून संबंधित गावांना पाणीपुरवठा करण्यासाठी उभारण्यात आलेली पाईपलाईन अनेक ठिकाणी दुरुस्तीची आवश्यकता आहे. तसेच योजनेतील काही तांत्रिक अडचणी दूर करणे गरजेचे आहे. पाणीपुरवठा योजना बंद असल्यामुळे नागरिकांना पर्यायी स्रोतांवर अवलंबून राहावे लागत आहे. त्यामुळे पाईपलाईनची तातडीने पाहणी करून आवश्यक दुरुस्ती करावी, तांत्रिक अडचणी दूर कराव्यात आणि तावरजा मध्यम प्रकल्पावरील वीस खेडी पाणीपुरवठा योजना पूर्ववत सुरू करून संबंधित गावांचा पाणीप्रश्न कायमस्वरूपी सोडवावा, अशी मागणी निवेदनाद्वारे करण्यात आली. यावेळी पंचायत समितीचे सभापती, उपसभापती, पंचायत समिती सदस्य तसेच काँग्रेस पक्षाचे पदाधिकारी व कार्यकर्ते उपस्थित होते.
