सीबीआयचे ३ ठिकाणी छापे, पालक, विद्यार्थ्यांची चौकशी
नांदेड : प्रतिनिधी
सीबीआयचे पथक पुन्हा एकदा नांदेडमध्ये दाखल झाले असून, या पथकाने ३ ठिकाणी चौकशी केल्याची माहिती सूत्रांनी दिली. शिवाजीनगर आणि भाग्यनगर पोलिस ठाण्याच्या हद्दीत २ ठिकाणी सीबीआयकडून छापा टाकण्यात आला आहे. नीट पेपरफुटी प्रकरणात २ विद्यार्थी आणि एका कुटुंबाची सीबीआयने चौकशी केल्याची माहिती समोर आली आहे.
सीबीआयच्या पथकाने ७ ते ८ तास चौकशी केली असून, त्यानंतर हे पथक लातूरला रवाना झाल्याचे सांगण्यात आले.
नीट पेपरफुटी प्रकरणी सीबीआयने तपास वेगात सुरू केला असून, मिळालेली माहिती आणि धागेदो-यावरून सीबीआय विविध ठिकाणी छापे टाकून चौकशी करीत आहे. नांदेडमध्येही आज सीबीआय पथकाने तीन ठिकाणी धाडी टाकून संशयितांची कसून चौकशी केली. नीट पेपरफुटी प्रकरणी आतापर्यंत सीबीआयने १३ जणांना अटक केली आहे. सीबीआयची धडक कारवाई सुरू असतानाच आज सीबीआयचे पथक पुन्हा एकदा नांदेडमध्ये धडकले.
नांदेडमधील शिवाजीनगर आणि भाग्यनगर पोलीस ठाण्याच्या हद्दीत सीबीआने तपास केला. या प्रकरणात सीबीआयने दोन विद्यार्थिंनी आणि एका कुटुंबाची चौकशी केल्याची माहिती समोर आली आहे. यापूर्वी चौकशी केलेल्या एका विद्यार्थिनीची पुन्हा एकदा चौकशी करण्यात आल्याचे समजते.
