मुंबई : नीट पुनर्परीक्षा येत्या रविवारी (दि. २१ जून) होत आहे. या परीक्षेची प्रवेशपत्र डाऊनलोड करण्यासाठी परीक्षा शुल्काच्या परताव्याची बँक खात्याची तपशिलाची अट घातली आहे. प्रवेशपत्र आणि शुल्क परतावा या दोन्ही प्रक्रिया राष्ट्रीय परीक्षा संस्थेने एकत्रित राबविल्याने पुन्हा एकदा नीट परीक्षार्थींचे टेन्शन वाढले आहे. त्यातच सर्व्हरच्या तांत्रिक अडचणीने परीक्षार्थी हवालदिल झाले आहेत.
वैद्यकीय पदवी प्रवेश प्रक्रियेसाठी अद्याप देशभरात नोंदणी केलेल्या २२ लाखांपैकी केवळ ४ लाख विद्यार्थ्यांचे प्रवेशपत्र डाऊनलोड झाले आहेत. अद्याप १८ लाख ७९ हजार ७४३ विद्यार्थी प्रवेशपत्राच्या प्रतीक्षेत आहेत. राष्ट्रीय परीक्षा संस्थेने (एनटीए) ही आकडेवारी जाहीर केली आहे. सोमवारी दिवसभर परीक्षार्थी प्रवेशपत्र डाऊनलोड करत होते. मात्र बँक तपशील भरूनही प्रवेशपत्र डाऊनलोड झाली नसल्याने हवालदिल झाले. देशभरातून एनटीएने दिलेल्या हेल्पलाईन क्रमांकावर परीक्षार्थी संपर्क साधत होते. अखेर सर्व्हरची अडचण दूर केली जाईल, असे यंत्रणेने ऑनलाईन जाहीर केले आहे.
परीक्षा शुल्क परताव्यासाठी दुरुस्ती विंडो
नीट परीक्षेचा पेपर फुटल्याने एनटीएने ३ मे २०२६ ला झालेली परीक्षा पुन्हा २१ जूनला घेण्याचा निर्णय घेतला. पूर्वी दिलेल्या परीक्षेचे शुल्क परताव्याचा निर्णय झाला. त्यासाठी नोंदणी पोर्टलद्वारे परीक्षार्थींना बँक खात्याचे तपशील भरण्याची संधी दिली होती. मात्र छाननीत अवैध खाते आणि इतर चुकीचा तपशील आढळून आला. त्यामुळे पुन्हा बँक खात्याचे तपशील पडताळून दुरुस्त करून शुल्क परताव्यासाठी बँक खाते पुनर्सत्यापन, दुरुस्ती विंडो एनटीएन सुरू करणार आहे. नोंदणीकृत मोबाईलवर ओटीपी मिळाल्यानंतरच या सुविधेत प्रवेश मिळणार आहे.
काहींची परीक्षा केंद्रे बदलली
राष्ट्रीय परीक्षा संस्थेने सर्वच ठिकाणच्या परीक्षा देण्यासाठी जिल्हा तोच ठेवला आहे. यापूर्वी ३ जूनच्या परीक्षेच्या वेळी परीक्षार्थींना मिळालेले परीक्षा केंद्र बदलले आहे. काहींना शहराबाहेरील कॉलेजमधील केंद्रे मिळाली आहेत.
