धाराशिव : प्रतिनिधी
तुळजापूर तालुक्यातील नळदुर्ग येथील दिशा नागरी सहकारी पतसंस्थेच्या शाखेतून २ कोटी ६१ लाख ४२ हजार २७ रूपये किंमतीचे ४ किलो ७६२ वजनाचे सोन्याचे दागिने व रोख २ लाख २१ हजार २४५ रूपये चोरट्यांनी लंपास केले. ही चोरीची घटना दि. ८ नोव्हेंबर रोजी घडली. या प्रकरणी दिशा पतसंस्थेचे व्यवस्थापक उमेश जाधव यांनी दिलेल्या फिर्यादीवरून सहा जणांच्या विरोधात नळदुर्ग पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार तुळजापूर तालुक्यातील नळदुर्ग येथे दिशा नागरी सहकारी पतसंस्थेची शाखा कार्यरत आहे. या शाखेतून आरोपी राहुल राजेंद्र जाधव, रा. नळदुर्ग, सुशिल राठोड रा. नळदुर्ग व अन्य चार व्यक्तींनी ८ नोव्हेंबर रोजी रात्री दिशा पतसंस्थेच्या नळदुर्ग शाखेच्या मुख्य शटरचे लॉक चावीने उघडून आत प्रवेश केला. चोरट्यांनी तिजोरीतील ४ किलो ७६२ ग्रॅम, ६७९ मिलीग्रॅम वजनाचे सोन्याचे दागिने अंदाजे २ कोटी ६१ लाख ४२ हजार २७ रूपये किंमतीचे व रोख रक्कम २ लाख २१ हजार २४५ रूपये असा एकून २ कोटी ६३ लाख ६३ हजार २७२ रूपये किंमतीचा माल चोरुन नेला.
या प्रकरणी दिशा नागरी सहकारी पतसंस्थेचे शाखा व्यवस्थापक उमेश भानुदास जाधव, रा. गवळी गल्ली नळदुर्ग ता. तुळजापूर यांनी दि. ९ नोव्हेंबर रोजी दिलेल्या प्रथम खबरेवरुन नळदुर्ग पोलीस ठाणे येथे भा.न्या.सं.कलम ३१६ (५), ३३१ (४), ३०५, ६१ (२), ३(५) अन्वये गुन्हा नोंदवला आहे.
