मानवत (प्रतिनिधी): परभणी जिल्ह्यातील मानवत तालुक्यातून एक अत्यंत धक्कादायक आणि काळजाचा थरकाप उडवणारी घटना समोर आली आहे. मानवत-परभणी राष्ट्रीय महामार्गावरील कोल्हा शिवारात असलेल्या यशवाडी येथील प्रसिद्ध त्रिमूर्ती हनुमान मंदिराला संपूर्ण परभणी जिल्हा तसेच मराठवाड्यात विशेष धार्मिक महत्त्व आहे. दर शनिवारी या जागृत देवस्थानात मारुतीच्या दर्शनासाठी हजारो भाविकांची मोठी गर्दी होत असते. आज शनिवार, २० जून २०२६ रोजी सकाळपासूनच मंदिर परिसरात भाविकांची मोठी वर्दळ होती. दुपारी ३ वाजेच्या सुमारास मंदिरात सुरू असलेल्या सभामंडपाच्या बांधकामाचा स्लॅब अचानक कोसळल्याने मोठी दुर्घटना घडली. या भीषण दुर्घटनेत ७ भाविकांचा जागीच दुर्दैवी मृत्यू झाला असून, २० ते २५ भाविक ढिगाऱ्याखाली चिरडून गंभीर जखमी झाल्याची प्राथमिक माहिती समोर आली आहे.
मिळालेल्या माहितीनुसार, मुख्य मंदिरासमोरील गाभारा आणि सभामंडपाच्या विस्तारीकरणाचे काम सध्या युद्धपातळीवर सुरू होते. या नव्या बांधकामात मोठ्या प्रमाणावर दगडी पिलर आणि छतासाठी जड दगडांचा वापर केला जात होता. दुपारी ३ वाजेच्या सुमारास अनेक भाविक सभामंडपात दर्शनासाठी आणि महाप्रसादासाठी उपस्थित असताना, नव्याने बांधण्यात येत असलेल्या छताचा आणि पिलरचा मोठा भाग पत्त्यासारखा कोसळला. हा दगडी ढिगारा थेट खाली उभ्या असलेल्या भाविकांवर पडल्याने कोणालाही सावध होण्याची संधी मिळाली नाही. प्रत्यक्षदर्शींनी दिलेल्या माहितीनुसार, छत कोसळताना मोठा आवाज झाला आणि सर्वत्र धुळीचे साम्राज्य पसरले. भाविकांमध्ये एकच पळापळ सुरू झाली असून छताखाली आणि दगडी ढिगाऱ्याखाली अनेक लोक गाडले गेले होते. घटनास्थळावरील दृश्य अत्यंत थरकाप उडवणारे होते. दगडी बांधकामाचा भाग भाविकांवर पडल्याने अनेक जण ढिगाऱ्याखाली अडकले आणि मृतांचा आकडा आणखी वाढण्याची शक्यता नाकारता येत नाही.
घटना घडताच परिसरात उपस्थित असलेल्या इतर भाविकांनी आणि स्थानिक ग्रामस्थांनी कसलीही वाट न पाहता तातडीने ढिगारा उपसण्याचे आणि बचावकार्य सुरू केले. घटनेचे गांभीर्य ओळखून प्रशासकीय यंत्रणा तातडीने कामाला लागली. मानवत, परभणी, सेलू आणि पाथरी येथून तात्काळ रुग्णवाहिका, अग्निशामक दलाच्या गाड्या आणि वैद्यकीय पथके घटनास्थळी दाखल झाली. ढिगाऱ्याखालून काढण्यात आलेल्या जखमी भाविकांना तात्काळ उपचारासाठी परभणी येथील शासकीय जिल्हा रुग्णालय तसेच विविध खाजगी रुग्णालयांमध्ये हलवण्यात येत असून प्रशासनाकडून मदत व बचावकार्य युद्धपातळीवर सुरू आहे.
लाखो भाविकांचे श्रद्धास्थान असलेल्या या मंदिराच्या विस्तारीकरणाचे काम सुरू असताना सुरक्षेची काळजी घेतली गेली होती का, तसेच वापरण्यात आलेल्या साहित्याचा दर्जा कसा होता, असे गंभीर प्रश्न आता उपस्थित केले जात आहेत. दुर्घटनेचे नेमके तांत्रिक कारण अद्याप स्पष्ट झालेले नसून, जिल्हा प्रशासनाने या संपूर्ण प्रकरणाचा अधिक तपास आणि चौकशी सुरू केली आहे. या भीषण दुर्घटनेमुळे संपूर्ण परभणी जिल्ह्यावर आणि यशवाडी परिसरावर मोठी शोककळा पसरली आहे.
