मुंबई : प्रतिनिधी
मुंबईतील शिवाजी पार्क येथे रविवारी कॉकरोच जनता पार्टीच्या वतीने आज आंदोलनाची हाक दिली होती. य आंदोलनामुळे शिवाजी पार्क परिसरात प्रचंड पोलिस बंदोबस्त तैनात करण्यात आला होता. मात्र, आंदोलनात सहभागी होण्यासाठी आलेल्या आंदोलकांसह शिवसेना-मनसे कार्यकर्त्यांची पोलिसांनी धरपकड केली. त्यामुळे वातावरण तापले. या संपूर्ण घडामोडींदरम्यान आदित्य ठाकरे, अमित ठाकरे आणि तेजस ठाकरे हे बंधू रस्त्यावर उतरले. त्याचवेळी शिवसैनिक, मनसैनिक चांगलेच आक्रमक झाले. त्यामुळे शिवसेना भवनासमोर पोलिस-शिवसैनिकांत झटापट झाली. त्यावरून चांगलाच राडा झाला.
कॉकरोच जनता पार्टीच्या आंदोलनाला ठाकरे गट आणि महाराष्ट्र नवनिर्माण सेनेने पाठिंबा दिला. यादरम्यान पोलिसांनी शिवसेना भवनात घुसण्याचा प्रयत्न केल्याचा गंभीर आरोप शिवसैनिकांनी केला. पोलिसांनी या आंदोलनातील अनेक शिवसैनिकांना ताब्यात घेतले. ताब्यात घेतलेल्या शिवसैनिक, मनसैनिकांना तात्काळ सोडविण्यासाठी युवासेना प्रमुख आदित्य ठाकरे आणि तेजस ठाकरे हे स्वत: रस्त्यावर उतरले. दोन्ही नेत्यांनी आक्रमक होत पोलिसांच्या गाड्या अडवून धरल्या. जोपर्यंत आमच्या शिवसैनिकांना सोडले जात नाही, तोपर्यंत पोलिसांची गाडी इथून हलवू देणार नाही, अशी ठाम भूमिका आदित्य ठाकरे यांनी घेतली.
दुसरीकडे शिवाजी पार्क परिसरात आलेल्यांना पोलिसांकडून ताब्यात घेतले जात असल्याने मनसे पदाधिकारी आणि कार्यकर्तेही रस्त्यावर उथरले. पोलिसांनी मनसेच्या पदाधिका-यांचीही धरपकड करण्यास सुरुवात केली. यावेळी मनसे नेते अमित ठाकरे यांनी आंदोलनकर्त्यांना घेऊन जाणारी पोलिसांची गाडी अडवून धरत विरोध दर्शविला. मनसे कार्यकर्त्यांची वाढती गर्दी पाहून पोलिसांनी अतिरिक्त फौजफाटा मागवला आणि आंदोलकांना घेऊन जाणा-या गाड्या तेथून बाजूला केल्या.
आदित्य ठाकरे, अमित ठाकरे पोलिस ठाण्यात
पोलिसांनी ज्या आंदोलकांची धरपकड केली, त्यांना सोडविण्यासाठी आदित्य आणि अमित ठाकरे शिवाजी पार्क पोलिस ठाण्यात दाखल झाले. यावेळी पोलिस ठाण्याबाहेर मोठ्या प्रमाणात ठाकरे गटाच्या आणि मनसेच्या कार्यकर्त्यांनी गर्दी केली होती. त्यामुळे वातावरण चांगलेच तापले होते.
शिवसैनिक, मनसैनिक मुंबईत रस्त्यावर उतरेल
आदित्य ठाकरे यांनी पोलिस प्रशासनावर तीव्र शब्दांत नाराजी व्यक्त केली. आम्ही अनेकदा मुंबई पोलिसांच्या कामाचे कौतुक केले आहे. पण ते थेट दिल्ली पोलिसांसारखे वागू लागले आहेत. असेच प्रकार सुरू राहिले तर मुंबईच्या प्रत्येक कानाकोप-यात शिवसैनिक आणि मनसैनिक रस्त्यावर उतरल्याशिवाय राहणार नाही, असा इशारा दिला.
