रायगड : अजित पवार गटाच्यावतीने कर्जत येथे दोन दिवसीय शिबिराचे आयोजन करण्यात आले आहे. या शिबिराला अजित पवार राष्ट्रीय अध्यक्ष म्हणून मार्गदर्शन केले. या शिबिरामध्ये आजी-माजी आमदार खासदार आणि राज्यातले सर्व जिल्हाध्यक्षांना निमंत्रित करण्यात आले होते. शुक्रवारी या शिबिराचा शेवटचा दिवस होता. या शिबिरात बोलताना अजित पवारांनी आगामी लोकसभा निवडणुकीची तयारी सुरू करण्याच्या सूचना दिल्या. तसेच बारामतीसह ४ लोकसभा लढवणार असल्याचा गौप्यस्फोट त्यांनी केला आहे. बारामती, शिरूर, सातारा आणि रायगड या चार जागा तर आपण लढवणारच आहोत. याशिवाय ठाकरे गटाच्याही काही जागा लढवणार असल्याचे त्यांनी म्हटले आहे.
अजित पवार म्हणाले की, मार्च महिन्याच्या पहिल्या आठवड्यात लोकसभेची आचारसंहिता लागण्याची शक्यता आहे. पंतप्रधान नरेंद्र मोदी यांना पुन्हा एकदा पंतप्रधान म्हणून निवडून आणण्यासाठी आपल्याला प्रयत्न आणि काम करायचे आहे. महाराष्ट्रातून जास्तीत जास्त ४८ पैकी जास्तीत जास्त एनडीएच्या विचाराचे खासदार निवडणून आणण्यासाठी आपल्याला प्रयत्न करायचे आहेत असे अजित पवार यावेळी बोलताना म्हणाले. आमच्यावर आरोप होते की गुन्हे दाखल होते म्हणून आम्ही भाजपसोबत गेलो. विकास कामे व्हावी, यासाठी आपण सरकारमध्ये आलो आहोत. माझ्यावर जे आरोप झाले ते निर्णय मी एकट्याने घेतले नव्हते. त्याला मंत्रिमंडळाची मंजुरी होती, असेही ते म्हणाले.
निकालानंतर महाराष्ट्रातील जागांवर चर्चा
अजित पवार म्हणाले की, शिवसेनेच्या उद्धव ठाकरे गटाकडे असणाऱ्या काही जागा आपण लढवणार आहोत. त्यासंदर्भात देवेंद्र फडणवीस आणि एकनाथ शिंदे यांच्याशी चर्चा करुन निर्णय होणार आहे. पाच राज्यातील निकालानंतर केंद्रीय गृहमंत्री अमित शाह यांच्याशी महाराष्ट्रातील जागांवर चर्चा होणार आहे.
