रायपूर : थ्रिलर चित्रपटात शोभेल असाच एक धक्कादायक प्रकार समोर आला असून कुप्रसिद्ध ठग आणि सिरीयल किलर चार्ल्स शोभराज याच्या गुन्हेगारी स्टाईलने प्रेरित होऊन देशातील तब्बल ३०० हून अधिक आलिशान फाईव्ह स्टार हॉटेल्सना कोट्यवधी रुपयांचा चुना लावणा-या एका ६९ वर्षीय वृद्धाला रायपूर पोलिसांनी अटक केली आहे. बिंग्सन जॉन असे या भामट्याचे नाव असून तो मूळचा तामिळनाडूचा रहिवासी आहे. गेल्या तीन दशकांपासून बनावट ओळखपत्रांच्या आधारे हॉटेल्समध्ये मुक्काम ठोकून, बिल न भरताच रफूचक्कर होण्यात तो पटाईत होता.
अशी असायची ‘ऑपरेशन मॉडस ऑपेरंडी’
बिंग्सन जॉन हा इंग्रजी माध्यमात शिकलेला असून अत्यंत सफाईदारपणे इंग्रजी बोलायचा. हॉटेल्समध्ये संशय येऊ नये म्हणून तो कधी विदेशी पर्यटकांचा गाईड, कधी इंग्रजीचा प्राध्यापक, तर कधी योगा ट्रेनर असल्याचे सांगायचा. फाईव्ह स्टार हॉटेल्समधील कर्मचा-यांवर आपल्या उच्चशिक्षित राहणीमानाची आणि इंग्रजीची अशी काही भुरळ पाडायचा की, हॉटेल प्रशासन त्याच्याकडून कोणतीही अॅडव्हान्स रक्कम मागत नसे. काही दिवस आलिशान सोयी-सुविधांचा मोफत आस्वाद घेतल्यानंतर, कोणालाही थांगपत्ता लागू न देता तो तिथून पळ काढायचा. अनेकदा पळताना तो हॉटेलमधील महागड्या वस्तूही चोरून नेण्यात पटाईत होता.
रायपूरच्या ‘हायत’ हॉटेलमध्ये केली शेवटची चूक
काही दिवसांपूर्वी बिंग्सनने छत्तीसगडमधील रायपूर येथील प्रसिद्ध फाईव्ह स्टार ‘हॉटेल हायत’ला लक्ष्य केले. तिथे तो दोन दिवस राहिला. हॉटेलचे ६३ हजार ७५५ रुपयांचे बिल न भरताच, तो ‘ऑफिसच्या कामासाठी’ म्हणून हॉटेलचा १ लाख ४८ हजार रुपयांचा लॅपटॉप घेऊन पसार झाला. हॉटेल प्रशासनाने याप्रकरणी पोलिसांत तक्रार दाखल केली.
