इस्लामाबाद : जागतिक युद्धाच्या छायेत एका बाजूला संपूर्ण जग इंधनाच्या भीषण संकटाचा सामना करत असताना, दुसरीकडे पाकिस्तानला एक मोठा जॅकपॉट लागला आहे. भारताच्या सीमेला लागून असलेल्या सिंध प्रांतात पाकिस्तानला तेल आणि नैसर्गिक वायूचा मोठा साठा सापडला आहे. होर्मुझच्या संकटामुळे हतबल झालेल्या पाकिस्तानला या शोधामुळे भविष्यात काहीसा दिलासा मिळण्याची शक्यता निर्माण झाली आहे. मात्र, एवढ्या मोठ्या प्रमाणावर तेलाचा खजिना सापडूनही पाकिस्तानातील महागाई आणि तेलाचे दर कमी का होणार नाहीत. पाकिस्तानचा सिंध प्रांत भारताच्या राजस्थान सीमेजवळ पाकिस्तानी सीमेवर येतो.
पाकिस्तानच्या तेल आणि वायू कंपनीने दक्षिण सिंध प्रांतातील संगेर जिल्ह्यात तेल आणि वायू साठ्यांचा शोध लावला आहे. ऑइल अँड गॅस डेव्हलपमेंट कंपनी लिमिटेडने म्हटले आहे की, या शोधामुळे केवळ ओजीडीसीएल आणि देशाच्या हायड्रोकार्बन साठ्यात वाढ होणार नाही, तर देशांतर्गत संसाधनांच्या माध्यमातून देशाची ऊर्जेची मागणी आणि पुरवठा यांमधील तफावत भरून काढण्यासही मदत होण्याची अपेक्षा आहे.
गेल्या महिन्यात तेल विहिरींचा शोध लागला
पाकिस्तान स्टॉक एक्सचेंज आणि लंडन स्टॉक एक्सचेंजला पाठवलेल्या एका पत्रात, ओजीडीसीएलने भागधारकांना कळवले आहे की, गेल्या महिन्यात संघार जिल्ह्यातील बोबी आणि धमराकी परिसरात तेलसाठे सापडले आहेत. ३ जून रोजीच्या या पत्रात, ओजीडीसीएलने म्हटले आहे की, बोबी आणि धमराकी खाणपट्ट्यांमध्ये १००% कार्यकारी हिश्श्याचे संचालक म्हणून, त्यांना त्यांच्या ‘बोबी डीप-१’ या अन्वेषण विहिरीतून तेलाचा शोध लागला आहे. ही विहीर ३२/६४ इंच चोक साईजवर दररोज २,००० बॅरल तेल आणि १.१ दशलक्ष मानक घनफूट वायू उत्पादन करत आहे, याचा वेलहेड प्रवाही दाब १,०५० पाउंड प्रति चौरस इंच आहे.
विहीर ३,००० मीटरपेक्षा जास्त खोदली
या विहीरी ३ मे रोजी सापडल्या, जेव्हा ओजीडीसीएलच्या तांत्रिक आणि परिचालन क्षमतांचा वापर करून सेम्बर फॉर्मेशनमध्ये एकूण ३,३०५ मीटर खोलीपर्यंत विहीर खोदण्यात आली. हा शोध बोबी आणि धमरकाकी खाणपट्ट्यांसाठी एक महत्त्वाचा टप्पा आहे, कारण या भागातील एका मोठ्या वाळूच्या थरातून लागलेला हा पहिला हायड्रोकार्बनचा शोध आहे असेही या पत्रात नमूद केले आहे.
