मुंबई : प्रतिनिधी
मराठी सक्तीवरून आंदोलने करणा-या अमराठी रिक्षाचालकांना महाराष्ट्र नवनिर्माण सेनेने इशारा दिला आहे. काल कांदिवली लिंक रोडवर लालजी पाडा येथे रिक्षाचालकांनी बेकायदा आंदोलन केले. त्यांनी रिक्षा रोखून ट्रॅफिक जॅम केले. मराठी बोलणार नाही अशी मुजोरी हे रिक्षाचालक दाखवत होते. आता या अमराठी रिक्षाचालकांविरोधात मनसेने दंड थोपटले आहेत. कांदिवली पश्चिममध्ये मनसेने अमराठी रिक्षाचालकांना इशारा दिला आहे. ‘मराठी शिकण्यात कमीपणा वाटत असेल तर परत निघून जा, ही शेवटची नम्र विनंती’. संप करून मुंबईकरांना वेठीस धरल्यास मनसे गप्प बसणार नाही असा इशारा बॅनरवरून देण्यात आला आहे.
मनसेने कांदिवली पश्चिममध्ये अमराठी रिक्षाचालकांना इशारा देणारे बॅनर लावले आहेत. ‘अमराठी रिक्षाचालकांना विनंती आहे, मराठी शिकण्यात व बोलण्यात कमीपणा वाटत असेल तर परत निघून जा!’ असे या बॅनरवर लिहिले आहे. मात्र संप आणि आंदोलन करून मुंबईकरांना वेठीस धरले तर मनसे गप्प बसणार नाही, ही शेवटची नम्र विनंती. मनसे विभाग अध्यक्ष दिनेश साळवी यांनी हे बॅनर लावले असून अमराठी चालकांनी मराठीचा सन्मान करावा असा इशारा त्यांनी दिला आहे.
दरम्यान अमराठी रिक्षाचालकांवर सुरू असलेल्या कारवाई दरम्यान मोठ्या संख्येने अमराठी ऑटो रिक्षाचालक बोरीवली आरटीओ कार्यालयात जमा झाले आहेत. काल मुंबईच्या वेगवेगळ्या भागात अमराठी रिक्षाचालकांनी आरटीओच्या कारवाईला विरोध करत संप पुकारला होता. या संपादरम्यान अनेक ठिकाणी गोंधळ झाल्याचे पाहायला मिळाले होते. आरटीओकडून मराठी भाषा संदर्भात सुरू असलेल्या कारवाईमुळे अमराठी चालकांमध्ये नाराजी आहे. या पार्श्वभूमीवर आज मोठ्या संख्येने ऑटो रिक्षाचालक बोरीवली आरटीओ कार्यालयात जमा झाले आहेत.
किमान मराठी बोलता यावे, अशी या रिक्षाचालकांकडून अपेक्षा आहे. पण व्यावहारिक मराठी सुद्धा न बोलणा-या रिक्षा चालकांविरोधात कारवाई सुरू झाली आहे.
