निलंगा : लक्ष्मण पाटील
निलंगा तालुक्यातील कासार बालकुंदा येथील जवान समाधान महिपती मधाळे यांच्यावर बुधवारी दि. २१ ऑक्टोबर रोजी शासकीय इतमामात अंत्यसंस्कार करण्यात आले. अमर रहे अमर रहे समाधान मधाळे अमर रहे!’ अशा घोषणांनी परिसर दुमदुमला. ग्रामस्थांनी आपल्या वीर सुपुत्राला साश्रुनयनांनी अखेरचा निरोप दिला. त्यांच्या निधनाने कासार बालकुंदासह पंचक्रोशीत शोककळा पसरली आहे.
समाधान मधाळे हे जम्मू-काश्मीर येथे भारतीय सैन्याच्या ७ महार रेजिमेंटमध्ये कर्तव्य बजावत होते. १४ ऑक्टोबर रोजी सकाळी सुमारे सात वाजता त्यांना हृदयविकाराने रुग्णालयात दाखल करण्यात आले होते. उपचारादरम्यान त्यांची प्राणज्योत मालवली. त्यांच्या निधनाची बातमी समजताच गावावर दु:खाचा डोंगर कोसळला.समाधान मधाळे यांच्या पश्चात आई बालिका महिपती मधाळे, पत्नी पल्लवी, पाच वर्षांची मुलगी सानवी, भाऊ दत्ता व शांतकुमार, भावजय शालिनी व पूनम असा परिवार आहे. अवघ्या पाच वर्षांच्या चिमुरडीच्या डोक्यावरील पितृछत्र हरपल्याने सर्वत्र हळहळ व्यक्त होत आहे. देशसेवेचा ध्यास, कर्तव्याप्रती निष्ठा आणि मातृभूमीवरील प्रेम जपणा-या समाधान मधाळे यांच्या निधनाने गावाने कर्तव्यनिष्ठ सुपुत्र गमावला आहे. त्यांच्या स्मृती कायम जपण्याचा निर्धार व्यक्त करत ग्रामस्थांनी अश्रूंच्या धारा आणि अमर रहे अमर रहेच्या घोषणांत आपल्या लाडक्या जवानाला अखेरचा निरोप दिला
यावेळी औसा विधानसभा मतदारसंघाचे आमदार अभिमन्यू पवार, उपविभागीय अधिकारी शरद झाडके, उपविभागीय पोलिस अधिकारी विशाल धुमे पाटील, तहसीलदार शिवाजी कदम, एपीआय गरजे, एपीआय वाघमारे, पीएसआय माळवदकर, मंडळ अधिकारी सूरज स्वामी, ग्रामविकास अधिकारी बालाजी नलमले, ग्राममहसूल अधिकारी पाटील, कर्नल पांढरे, कॅप्टन कृष्णागिरी, कॅप्टन रमेश तांबोळे यांच्यासह लातूर व धाराशिव जिल्ह्यातील माजी सैनिक संघटनांचे पदाधिकारी, पोलिस अधिकारी आणि ग्रामस्थ उपस्थित होते.
