शिरूर अनंतपाळ : शकील देशमुख
दुष्काळ आणि पाणीटंचाईचा फटका आता बांधकाम क्षेत्रालाही बसू लागला आहे. तालुक्यातील बांधकामे आणि काँक्रीट रस्त्यांच्या सुमारे ५० टक्के कामांना सध्या ब्रेक लागला आहे. पाणीटंचाईमुळे शासकीय विकासकामे बंद पडली असली, तरी घरगुती बांधकामे आणि घरकुल योजनेतील कामे अद्याप सुरू आहेत.
शिरूर अनंतपाळ शहरासह ग्रामीण भागातही बांधकामांची स्थिती जवळपास सारखीच आहे. अनेक शासकीय बांधकामे आणि काँक्रीट रस्त्यांची कामे बंद आहेत. मात्र, घरगुती बांधकामे आणि घरकुल योजनेतील कामे सुरू असून, त्यासाठी खासगी पाणीपुरवठा तसेच सार्वजनिक पाणीपुरवठ्याचा आधार घेतला जात आहे. सध्या पाण्याची तीव्र टंचाई सर्वत्र जाणवत नसल्याने नागरिकांकडून बांधकामांबाबत फारशी चिंता व्यक्त होत नाही. मात्र, आगामी काळात पाणीटंचाई तीव्र होण्याची शक्यता लक्षात घेता बांधकामांसाठी होणा-या पाणीवापरावर नियंत्रण ठेवण्याची गरज आहे.
