मुंबई, पुणे, कोकणातील पावसाचा जोर ओसरणार
मुंबई : प्रतिनिधी
राज्यात मुंबईसह ठाणे पालघर आणि कोकणात मुसळधार पाऊस झाला आहे. या पावसामुळे या भागांतील जनजीवन विस्कळीत झाले. आता मान्सून संपूर्ण देशात व्यापला आहे. त्यामुळे हा पाऊस उत्तरेकडे सरकत आहे. त्यामुळे उद्यापासून म्हणजे १० जुलैपासून मुंबईसह कोकण वगळगता उर्वरित महाराष्ट्रात पावसाचा जोर ओसरणार असल्याची माहिती ज्येष्ठ हवामान अभ्यासक माणिकराव खुळे यांनी दिली.
सरासरी ८ जुलै रोजी देश काबीज करणारा मान्सून १ दिवस उशिराने आज ९ जुलै रोजी देशात पोहोचला. मान्सून काळात समुद्र सपाटी ते दीड कि. मी. उंचीपर्यंतचा हवेच्या कमी दाबाचा देशाच्या मध्यावर असणारा मान्सूनचा स्टफ काहीसा उत्तरेकडे म्हणजे अनुपगड, रोहतक, फुरसतगंज, देहरी, धनबाद, बांकुरा, दिघा ते बंगालच्या उपसागरापर्यंत स्थित आहे.
त्यातच महाराष्ट्रात काही भागांत सुरू असलेल्या पावसाचा जोर शुक्रवार, दि. १० जुलै रोजी मुंबईसह कोकण वगळता उर्वरित महाराष्ट्रात पाऊस ओसरण्याची शक्यता आहे. आज काही भागात उघडीप जाणवली. मुंबईसह कोकणातही पावसाचा जोर ओसरला. उर्वरित महाराष्ट्रातही तुरळक ठिकाणी किरकोळ पावसाची शक्यता आहे. शुक्रवार दि. १० जुलै ते रविवार दि. १९ जुलैपर्यंतच्या संपूर्ण दहा दिवसात मुंबईसह कोकण वगळता उर्वरित महाराष्ट्रात उघडीप मिळण्याची शक्यता आहे.
राज्यात मान्सूनला ब्रेक
मान्सून देशात व्यापला असला तरी मुंबईसह कोकण, पुणे, पश्चिम महाराष्ट्राला झोडपून काढणारा पावसाचा वेग मंदावणार आहे. कोरड्या वा-यामुळे हवेतील आर्द्रता कमी होईल. त्यामुळे राज्यातील ब-याच भागांत मान्सूनला ब्रेक लागणार आहे. २० जुलैपर्यंत राज्यात मान्सून सक्रीय होण्याची शक्यता खूपच कमी आहे, असे कृषी खात्याने म्हटले.
मुंबई ६ दिवसात
१२४० मिमी पाऊस
मुंबईने यंदा पावसाचा एक नवीन विक्रम प्रस्थापित केला. जून कोरडा गेला. त्यानंतर जुलैच्या पहिल्याच आठवड्यात मुंबईने सर्व विक्रम मोडले. ३० जून ते ६ जुलैदरम्यान दिल्लीत संपूर्ण हंगामात पडणा-या पावसाएवढा आणि बंगळुरूच्या वार्षिक पावसाएवढा मुंबईत पाऊस झाला. ६ दिवसांत अंदाजे १२४० मि.मी. पाऊस झाला असून, हा गेल्या शतकातील सर्वाधिक पाऊस ठरला.
