मुंबई-पुण्याच्या प्रवाशांना रेल्वे विभागाचे आवाहन
मुंबई : प्रतिनिधी
राजधानी मुंबई, कोकण आणि पुण्यातही गेल्या ४ ते ५ दिवसांत मुसळधार पाऊस पडला असून लोणावळ््यातही धो-धो पाऊस कोसळला. त्यामुळे लोणावळा भागात काही ठिकाणी रेल्वे मार्गावर दरडी कोसळल्या. त्यामुळे २ दिवसांपूर्वी रेल्वेसेवा विस्कळीत झाली. आता वाहतूक सुरळीत करण्याचे काम रेल्वे विभागाकडून सुरू आहे. दरम्यान, प्रवाशांची गैरसोय टाळण्यासाठी मध्य रेल्वेने १० ते १७ जुलैदरम्यान अनेक नियमित तसेच विशेष एक्स्प्रेस गाड्या तात्पुरत्या रद्द करण्याचा निर्णय घेतला आहे.
लोणावळा-कर्जत रेल्वे मार्गावर ६ जुलै रोजी झालेल्या मुसळधार पावसामुळे अनेक ठिकाणी दरडी कोसळल्याने रेल्वे वाहतुकीवर मोठा परिणाम झाला. तीनही रेल्वे मार्ग पूर्ववत करण्यासाठी मध्य रेल्वेकडून युद्धपातळीवर काम सुरू असले तरी मोठ्या प्रमाणावरील नुकसान आणि प्रतिकूल परिस्थितीमुळे दुरुस्तीला वेळ लागणार आहे. त्यामुळे १० ते १७ जुलैदरम्यान ब-याच गाड्या रद्द केल्या आहेत.
या गाड्या रद्द
रद्द करण्यात आलेल्या प्रमुख गाड्यांमध्ये डेक्कन क्वीन, डेक्कन एक्स्प्रेस, पुणे-सीएसएमटी इंटरसिटी, सीएसएमटी-हैदराबाद एक्स्प्रेस, हुबळी-दादर एक्स्प्रेस, दौंड-इंदूर एक्स्प्रेस आणि चेन्नई एग्मोर सुपरफास्ट मेल यांचा समावेश आहे. तसेच महालक्ष्मी एक्स्प्रेस, दादर-सातारा, दादर-साईनगर शिर्डी या गाड्याही विविध तारखांना रद्द करण्यात आल्या.
लांब पल्ल्याच्या
विशेष गाड्याही रद्द
सीएसएमटी-गोरखपूर, पुणे-गोरखपूर, पुणे-गाझीपूर सिटी आणि पुणे-हजरत निजामुद्दीन या विशेष गाड्याही संबंधित तारखांना रद्द करण्यात आल्या आहेत. मध्य रेल्वेचे वरिष्ठ अधिकारी घटनास्थळी उपस्थित राहून दुरुस्तीच्या कामावर लक्ष ठेवून आहेत.
