५०० मीटरच्या परिघात एनर्जी ड्रिंक विक्रीवर प्रतिबंध, झिरवाळ यांची माहिती
मुंबई : प्रतिनिधी
शाळा आणि महाविद्यालयांच्या ५०० मीटरच्या परिघात ‘स्टिंग एनर्जी ड्रिंक’च्या विक्रीस बंदी घालण्यात आली असून त्याबाबत शाळेतील शिक्षक आणि मुख्याध्यापक यांना सूचना देण्यात आल्या असल्याचे अन्न व औषध प्रशासनमंत्री नरहरी झिरवाळ यांनी विधानसभेत प्रश्नोत्तरांच्या तासात सांगितले. पेयांची विक्री आढळून आल्यास संबंधितांवर प्रचलित कायद्यानुसार कारवाई करण्यात येईल, असेही झिरवाळ म्हणाले.
स्टिंग एनर्जी ड्रिंकमुळे आरोग्यावर होणा-या दुष्परिणामांबाबत आमदार विक्रम पाचपुते आणि राहुल कुल यांनी प्रश्न उपस्थित केला होता. या स्टिंगची मोठ्या प्रमाणावर जाहिरात करण्यात येते. सोशल मीडियाद्वारेही याचा प्रसार होत असतो. मात्र, स्टिंगच्या अतिसेवनामुळे हृदयाचे ठोके अचानक वाढून अहिल्यानगरमधील श्रीगोंदा, पाथर्डी येथे मुलांचा मृत्यू झाल्याच्या घटना घडल्या असून शासन यावर निर्बंध आणणार का, अशी विचारणा विक्रम पाचपुते यांनी केली. स्टिंग एनर्जी ड्रिंकमध्ये विद्यार्थ्यांच्या आरोग्यास हानी पोहोचवणारे कॅफिन, अतिप्रमाणातील साखर आणि कृत्रिम रंग यांसारखी घातक रसायने व घटक किती प्रमाणात आढळतात, याची अन्न सुरक्षा आणि मानके प्राधिकरणाने (एफएसएसआय) तपासणी केली आहे काय, असाही प्रश्न पाचपुते यांनी केला.
शाळकरी मुले आणि महाविद्यालयीन विद्यार्थ्यांमध्ये या पेयाच्या अतिसेवनामुळे हृदयविकार, निद्रानाश, किडनीचे आजार आणि अलीकडेच काही विद्यार्थी, तरुणांचा मृत्यूही झाल्याच्या घटना समोर आल्या असल्याची बाब विक्रम पाचपुते यांनी या वेळी निदर्शनास आणली. त्यामुळे या पेयाच्या बाटलीवर ‘लहान मुलांसाठी शिफारस केलेली नाही’, असा इशारा असूनही शाळा-कॉलेजच्या कॅन्टीनमध्ये व कॅम्पस परिसरात याची विक्री केली जात आहे. यावर पूर्ण बंदी घालण्यासाठी आणि याच्या जाहिरातींवर निर्बंध आणण्यात यावेत, अशी मागणी पाचपुते यांनी केली. त्यावर या पेयाच्या बाटलीवर गरोदर महिला किंवा स्तनदा माता, लहान मुले आणि कॅफिनची अॅलर्जी असलेल्या व्यक्ती यांच्यासाठी अयोग्य, असे स्पष्ट अक्षरात लिहिण्याचे बंधनकारक करण्यात आले असून शाळांच्या ५०० मीटरच्या परिघात या पेयाच्या विक्रीला बंदी घालण्यात येणार असल्याचे मंत्री झिरवाळ यांनी सांगितले.
आता एनर्जी ड्रिंक
उल्लेखावर बंदी
बाजारात जे काही सो कॉल्ड एनर्जी डिंक्स येतात, त्यांच्या कंपन्यांना एनर्जी ड्रिंक्स हा शब्द लिहिता येत नाही. ३० जून रोजी याबाबत त्यांना नोटीस काढण्यात आली आहे. अशा १०-१२ कंपन्या आहेत. यात पेप्सिको, रेड बुल, स्टिंगसारख्या कंपन्यांचा समावेश आहे. त्यामुळे आता एनर्जी ड्रिंकचा उल्लेख बंद होईल, असे आयुक्त तुकाराम मुंडे यांनी सांगितले.
दूध सम्राटांना वॉर्निंग
तुकाराम मुंढे अन्न व औषध प्रशासन विभागाचे आयुक्त झाल्यापासून कारवाईचा धडाका सुरु केला आहे. आता त्यांनी आपला मोर्चा दूध सम्राटांकडे वळवली असून, त्यासाठी सेव्ह फूड, सेव्ह ड्रग ही मोहीम हाती घेतली आहे. आता दूध सीलबंद असेल तरच घ्या, असे मुंढे म्हणाले. त्यामुळे सुटे दूध विकता येणार नाही. घ्यायचेच असेल तर शेतकरी आहे का, ते तपासा, असेही ते म्हणाले.
हॉटेलचालकांना इशारा
हॉटेल, रेस्टॉरंटमध्ये पेस्ट कंट्रोल केले असे सर्टीफिकेट दाखविले जाते. मात्र, प्रत्यक्षात काही हॉटेलमध्ये पेस्ट कन्ट्रोल केले गेले नाही. त्यामुळे त्यांचे लायसन्स रद्द करण्यात आल्याचे मुंढे यांनी सांगितले. त्यामुळे कागदी घोडे नाचवणा-यांवर आता कारवाईचा बडगा उगारला जाणार आहे, असे मुंढे म्हणाले.
