अमेरिकेसोबतचा करार संकटात, युद्धाचे ढग दाटले
तेहरान : वृत्तसंस्था
इराणच्या सैन्याने होर्मुझच्या सामुद्रधुनीतून चालणारी वाहतूक बंद करण्याचा निर्णय घेतला आहे. तशी घोषणा सैन्याच्या मुख्यालयाकडून करण्यात आलेली आहे. युद्ध संपवण्यासाठी अमेरिकेसोबत झालेल्या सामंजस्य कराराचे उल्लंघन झाल्याचा दावा इराणकडून करण्यात आला आहे. दक्षिण लेबनॉनमधून सैन्य न हटवल्याने आणि इस्रायलने सातत्याने शस्त्रसंधीचे उल्लंघन केल्याने होर्मुझमधून होणारी वाहतूक रोखण्याची घोषणा इराणने केली आहे. शस्त्रसंधीचे सातत्याने होत असलेले उल्लंघन म्हणजे विश्वासघात असल्याचे इराणने म्हटले.
होर्मुझची सामुद्रधुनी वाहतुकीसाठी बंद करणे हे पहिले पाऊल आहे. शस्त्रसंधीचे उल्लंघन सुरूच राहिल्यास आणखी कठोर पावले उचलण्यात येतील, असा इशारा इराणकडून देण्यात आला आहे. अमेरिका आणि इराणनं याच आठवड्यात सामंजस्य करारावर स्वाक्ष-या केल्या आहेत. त्यानंतरच होर्मुझची सामुद्रधुनी खुली करण्याची घोषणा करण्यात आली. पण आता इराणने होर्मुझमधील वाहतूक पुन्हा बंद केली आहे. राणने होर्मुझची सामुद्रधुनी वाहतुकीसाठी बंद करत जगाच्या गळ्याची नस पुन्हा दाबली आहे. या मार्गानं जगातील २० टक्के तेल व्यापार चालतो. त्यामुळे हा मार्ग जगाच्या अर्थव्यवस्थेच्या दृष्टीनं अतिशय महत्त्वाचा आहे. इराणने हा मार्ग पुन्हा बंद केल्याने खनिज तेलाचे दर पुन्हा वाढतील. त्यामुळे इंधनाचे दर वाढून महागाईचा भडका उडेल.
इस्रायलने हल्ले सुरू
ठेवल्याने नवे संकट
अमेरिका आणि इराण यांच्यात सामंजस्य करार होताच पुढच्या काही तासांमध्ये दक्षिण लेबनॉनमध्ये इस्रायली सैन्याने हल्ले चढवले. यात ७ जणांचा मृत्यू झाला. यामध्ये २ लहान मुलांचा समावेश आहे. इस्रायलने लेबनॉनवरील हल्ले सुरुच ठेवल्याने अमेरिका आणि इराण यांच्यातील सामंजस्य करार संकटात सापडला आहे.
