लातूर : प्रतिनिधी
सध्या बदलत्या वातावरणामुळे विविध प्रकारच्या श्वसनविकारांच्या रुग्णसंख्येत वाढ होत असून, स्वाईन फ्लू अर्थात एच-१एन-१ इन्फ्लुएन्झाबाबत नागरिकांनी सतर्क राहावे, असे आवाहन प्रसिद्ध छातीविकार तज्ज्ञ डॉ. रमेश भराटे यांनी केले आहे. स्वाईन फ्लू हा इन्फ्लुएन्झा एच-१एन-१ विषाणूमुळे होणारा श्वसनाचा संसर्ग असून, संक्रमित व्यक्तीच्या खोकला किंवा शिंकण्यामुळे निर्माण होणा-या श्वसनातील थेंबांद्वारे त्याचा प्रसार होऊ शकतो. त्यामुळे गर्दीच्या ठिकाणी काळजी घेणे आणि
संसर्गाची लक्षणे दिसल्यास वेळीच वैद्यकीय सल्ला घेणे आवश्यक असल्याचे डॉ. भराटे यांनी सांगितले. स्वाईन फ्लूच्या प्रमुख लक्षणांमध्ये ताप, अंगात कणकण, नाक वाहणे किंवा बंद होणे, घसा दुखणे, खोकला, कफ, डोकेदुखी, स्नायू व सांधे दुखणे, अशक्तपणा आणि जास्त थकवा यांचा समावेश होतो. काही रुग्णांमध्ये मळमळ, उलटी किंवा जुलाबाची लक्षणेही दिसू शकतात. श्वास घेण्यास त्रास, वाढता दम, छातीत दुखणे, ओठ किंवा चेहरा निळसर पडणे, सतत वाढता ताप, चक्कर किंवा गोंधळ, तसेच प्रकृती सुधारल्यानंतर पुन्हा अचानक बिघडणे यासारखी लक्षणे दिसल्यास तातडीने डॉक्टरांचा सल्ला घ्यावा, असे त्यांनी स्पष्ट केले. स्वाईन फ्लूची लक्षणे दिसल्यास घाबरून न जाता वेळेत वैद्यकीय तपासणी व योग्य उपचार घेणे अत्यंत महत्त्वाचे आहे. स्वत:हून औषधे घेण्याऐवजी तज्ज्ञ डॉक्टरांचा सल्ला घ्यावा, असे आवाहन डॉ. रमेश भराटे यांनी केले.
