तेहरान : होर्मुझच्या सामुद्रधुनीत मंगळवारी पनामा ध्वजांकित एमटी ऑन पीस या व्यापारी जहाजावर क्षेपणास्त्र हल्ला झाला. या हल्ल्यात ११ भारतीय खलाशांसह १२ कर्मचारी जखमी झाले आहेत. ओमानच्या अधिका-यांच्या मदतीने जखमी कर्मचा-यांना जहाजातून बाहेर काढण्यात आले. सर्व जखमींवर ओमानमधील खसाब येथील रुग्णालयात उपचार सुरू आहेत. भारताने या हल्ल्याचा निषेध केला आहे.
जहाजावर १७ भारतीय नागरिकांसह एकूण १९ कर्मचारी होते. होर्मुझच्या सामुद्रधुनीमध्ये आणि तिच्या आसपास व्यापारी जहाजांवरील हल्ल्यांमध्ये वाढ होत असतानाच एमटी ऑन पीसवर हल्ला झाला आहे. या प्रदेशात जहाजांवर होणारे सततचे हल्ले ही चिंतेची बाब असल्याचे परराष्ट्र मंत्रालयाने म्हटले आहे. शांतता आणि स्थिरतेसाठी हे हल्ले तात्काळ थांबवण्याचे आवाहन मंत्रालयाने केले. या प्रदेशात व्यापारी जहाजे, खलाशी आणि पायाभूत सुविधांना लक्ष्य करणे थांबले पाहिजे. याव्यतिरिक्त, आंतरराष्ट्रीय जलमार्गांमधून होणारी जहाजवाहतूक आणि व्यापार शक्य तितक्या लवकर पूर्ववत केला पाहिजे असे परराष्ट्र मंत्रालयाने पुढे नमूद केले.
या संघर्षात भारतीय खलाशीही बळी पडत आहेत. रॉयटर्सच्या माहितीनुसार, जुलै महिन्यात इराणच्या क्रूझ क्षेपणास्त्रांनी ओमानच्या सागरी हद्दीतून जाणा-या एमटी मोम्बासा आणि एमटी अल बहिया या संयुक्त अरब अमिरातीशी संबंधित दोन टँकर्सना लक्ष्य केले होते. या हल्ल्यात एक भारतीय कर्मचारी ठार झाला होता, तर १० जण जखमी झाले होते. इराण आणि अमेरिका यांच्यातील संघर्षामुळे जहाजांवर होणारे हल्ले तीव्र झाले आहेत. रॉयटर्सने ९ सप्टेंबरच्या घटनांचे वर्णन युद्ध सुरू झाल्यापासून दोन्ही बाजूंनी केलेले आतापर्यंतचे सर्वात मोठे हल्ले असे केले आहे. ९ सप्टेंबर रोजी अमेरिकेने इराणचे पाच तेल टँकर्स बुडवल्यानंतर, इराणने सामुद्रधुनीजवळ १० जहाजांवर हल्ला केल्याचा दावा केला होता, ज्यामध्ये किमान एक खलाशी ठार आणि एक जण बेपत्ता झाला होता.
ओमानच्या अधिका-यांची मदत
जखमी कर्मचा-यांना ओमानच्या अधिका-यांच्या मदतीने सुरक्षित बाहेर काढण्यात आले असून ओमानमधील खसाब येथे त्यांच्यावर वैद्यकीय उपचार सुरू आहेत. या जहाजावरील एकूण १९ कर्मचा-यांपैकी १७ जण भारतीय नागरिक आहेत. भारताने या हल्ल्याचा तीव्र निषेध केला असून मदतीबद्दल ओमान प्रशासनाचे आभार मानले आहेत.
परराष्ट्र मंत्रालयाने काय म्हटले?
परराष्ट्र मंत्रालयाने म्हटले आहे की, या भागात व्यापारी जहाजांवर होणारे सततचे हल्ले ही अत्यंत चिंतेची बाब असून शांतता आणि स्थिरतेसाठी हे हल्ले त्वरित थांबवणं आवश्यक आहे. या प्रदेशातील व्यापारी जहाजे, खलाशी आणि नागरी पायाभूत सुविधांना लक्ष्य करणे थांबले पाहिजे. आंतरराष्ट्रीय जलमार्गावरील दळणवळण आणि व्यापार लवकरात लवकर पूर्ववत झाला पाहिजे असे मंत्रालयाने म्हटले आहे.
