रायगड : प्रतिनिधी
कोकणातील रायगड जिल्ह्यातील दिवे आगार समुद्र किनारी आज ८ जणांचा पाण्यात बुडून मृत्यू झाल्याची धक्कादायक घटना घडली. सर्वजण पुण्यातील आळंदी येथून सहलीसाठी आले होते, अशी प्राथमिक माहिती आहे. पाण्याचा अंदाज न आल्याने आठही जण पाण्यात बुडाल्याची प्राथमिक माहिती आहे.
पुण्यातील आळंदी येथून एका खासगी क्लासची सहल पर्यटनासाठी आली होती. त्यातील ८ जण समुद्रकिनारी पाण्यात पोहण्याचा आनंद घेत असताना ही दुर्घटना घडली. या दुर्घटनेतील सर्व आठही जणांचे मृतदेह बाहेर काढण्यात आले. दिवे आगार येथे मृत पावलेले विद्यार्थी हे विनर्स अकॅडमीत शिक्षण घेत होते. ही खाजगी शिकवणी असून ते सर्वजण अकरावीचे शिक्षण घेत होते. ४२ विद्यार्थी आणि दोन शिक्षक असे ४४ जण आज दिवे आगारला ट्रिपसाठी गेले होते. त्यातील आठ विद्यार्थ्यांचा मृत्यू झाला. त्यामुळे हळहळ व्यक्त होत आहे.
दरम्यान, महाकाली वॉटर स्पोर्टसच्या कर्मचा-यांनी मृतदेह बाहेर काढण्यासाठी मदत केली. तसेच स्थानिक नागरिकांनीही सहकार्य केले. या दुर्घटनेने समुद्रकिनारी शोककळा पसरली आहे. दुर्घटनेतील सर्व मृतदेह बोर्ली पंचतन प्राथमिक आरोग्य केंद्रात आणण्यात आले. पोलिस आणि प्रशासन घटनास्थळी दाखल झाले असून अधिक तपास सुरू आहे.
