नवी दिल्ली : कोणत्याही नागरिकाचे आयुष्य मौल्यवान असते आणि ते वाचवण्यासाठी शासकीय प्राधिकरणांनी सर्व प्रयत्न केले पाहिजेत, अशा शब्दांत दिल्ली उच्च न्यायालयाने कार्यकर्त्यांच्या आरोग्याबाबत महत्त्वपूर्ण टिप्पणी केली आहे. केंद्रीय शिक्षणमंत्र्यांच्या राजीनाम्याची मागणी करत दिल्लीतील जंतरमंतर येथे उपोषणाला बसलेले सामाजिक कार्यकर्ते सोनम वांगचुक यांच्या प्रकृतीचे शासकीय डॉक्टरांकडून दररोज निरीक्षण केले जावे आणि त्यांचे प्राण वाचवण्यासाठी सर्व आवश्यक ते वैद्यकीय प्रयत्न केले जावेत, असा स्पष्ट आदेश दिल्ली उच्च न्यायालयाने केंद्र आणि दिल्ली सरकारला दिला आहे.
पेपरफुटी आणि शिक्षण व्यवस्थेतील अनियमिततेच्या मुद्यावरून कॉक्रोच जनता पार्टीच्या आंदोलनात सहभागी होत वांगचुक २८ जूनपासून बेमुदत उपोषणावर बसले आहेत. या उपोषणादरम्यान त्यांची प्रकृती झपाट्याने खालावली असून त्यांचे वजन तब्बल ८.५ किलोने घटले आहे. त्यांच्या जिवाला असलेला धोका लक्षात घेऊन, त्यांना तातडीने रुग्णालयात दाखल करून सक्तीने अन्न दिले जावे, अशी मागणी करणा-या याचिकेवर दिल्ली उच्च न्यायालयात सुनावणी पार पडली. यावेळी मुख्य न्यायाधीश देवेंद्र कुमार उपाध्याय आणि न्यायमूर्ती तेजस कारिया यांच्या खंडपीठाने एका जनहित याचिकेवर सुनावणी करताना सोनम वांगचुक यांच्या प्रकृतीबद्दल चिंता व्यक्त केली आहे. कोणत्याही नागरिकाचे आयुष्य मौल्यवान असते. वांगचुक यांच्या वैद्यकीय व शारीरिक स्थितीचे शासकीय डॉक्टरांकडून दररोज नियमितपणे निरीक्षण केले जावे, असे दिल्ली उच्च न्यायालयाने म्हटले. यावेळी सॉलिसिटर जनरल तुषार मेहता यांनी केंद्र आणि दिल्ली सरकारच्या वतीने बाजू मांडली.
वांगचुक यांची नियमीत तपासणी
वांगचुक यांच्या आरोग्याची शासकीय डॉक्टरांकडून नियमित तपासणी केली जात आहे. तसेच डॉक्टरांच्या सल्ल्यानुसार त्यांची प्रकृती अधिक खालावू नये म्हणून आवश्यक त्या सर्व वैद्यकीय उपाययोजना केल्या जातील, असे सॉलिसिटर जनरल तुषार मेहता यांनी न्यायालयात म्हटले. याचे न्यायालयाने स्वागत केले.
