मुंजा कंठाळे
बोरी : येथील एचपी पेट्रोल पंपावर डिझेलसाठी ट्रॅक्टरसह कॅन घेऊन शेतक-यांच्या लांबच लांब रांगा लागल्या आहेत. दि.१९ रोजी रात्रीपासून डिझेल संपले असून शेतक-यांनी पेट्रोल पंपवरच मुक्काम ठोकला होता. दोन दिवसानंतर शुक्रवार, दि.२२ रोजी सकाळ पासून डिझेल पुरवठा सुरळीत झाला आहे. डिझेल पुरवठा सुरळीत झाला असला तरी शेतक-यांकडून होत असलेली डिझेलची मागणी पाहता हा साठा पुरा पडेल का अशी शंका निर्माण होत आहे. डिझेल वेळेवर मिळत नसल्याने शेत मशागतीची कामे खोळंबली असून शेतक-यांमध्ये चिंतेचे वातावरणा निर्माण झाले आहे.
प्रशासनाकडून शेत मशागतीच्या कामासाठी ट्रॅक्टरला १०० लिटर पर्यंत डिझेल देण्याच्या सुचना पेट्रोल पंप चालकांना देण्यात आल्या आहेत. शेजारच्या हिंगोली जिल्ह्यात डिझेल तुटवडा निर्माण झाला असल्याने त्या ठिकाणचे शेतकरी डिझेलसाठी परभणी जिल्ह्यातील विविध ठिकाणी गर्दी करीत आहेत. त्यामुळे पेट्रोल पंपांवर लांबच लांब रांगा लागल्याचे चित्र पहावयास मिळत आहे. अनेक ठिकाणी नो स्टॉकचे बोर्ड लागले आहेत. त्यामुळे मान्सुनपूर्व शेत मशागतीची कामे खोळंबतात की काय अशी भिती व्यक्त होत आहे.
बोरी येथील एचपी पेट्रोल पंपवर दि.१९ मे रोजी रात्री ८ वाजल्यापासून डिझेल संपले होते. त्यामुळे शेतक-यांनी पंपावरच मुक्काम ठोकला होता. शुक्रवारी सकाळी १० वाजता डिझेल पंप सुरू झाले असून पंपांवर ट्रॅक्टरसह वाहनाच्या व कॅन घेऊन लांबच लांब रांगा लागल्या असल्याचे चित्र पहावयास मिळत आहे.
नियोजनाअभावी शेतकरी हैराण
सध्या मोठ्या प्रमाणात ट्रॅक्टरने मशागतीची कामे केली जात आहेत. या पार्श्वभुमीवर प्रशासनाने पेट्रोल पंप चालकांना ट्रॅक्टरसाठी १०० लिटर पर्यंत डिझेल देण्याचे आदेशही काढले आहेत. परंतू पुरवठा विभागाने कुठल्याही प्रकारचे नियोजन न केल्यामुळे डिझेल तुटवडा निर्माण झाला असून शेतकरी डिझेलसाठी हैराण झाले आहेत. पेट्रोल पंपांवर डिझेलसाठी लांबच लांब रांगा लागल्याचे चित्र पहावयास मिळत आहे. याकडे प्रशासनाने लक्ष देऊन डिझेल पुरवठा सुरळीत करण्याची मागणी शेतकरी करीत आहेत.
